ਅਬੂਜਾ, ਏਪੀ: ਅਫ਼ਰੀਕੀ ਦੇਸ਼ ਨਾਈਜੀਰੀਆ ਵਿੱਚ ਐਤਵਾਰ ਨੂੰ ਇਕ ਕੈਥੋਲਿਕ ਚਰਚ ਉੱਤੇ ਹੋਏ ਹਮਲੇ ਵਿੱਚ ਕਈ ਬੱਚਿਆਂ ਸਮੇਤ 50 ਤੋਂ ਵੱਧ ਲੋਕਾਂ ਦੇ ਮਾਰੇ ਜਾਣ ਦਾ ਖਦਸ਼ਾ ਹੈ। ਵੱਡੀ ਗਿਣਤੀ 'ਚ ਲੋਕ ਜ਼ਖਮੀ ਹੋਏ ਹਨ। ਹਮਲਾਵਰਾਂ ਨੇ ਆਟੋਮੈਟਿਕ ਹਥਿਆਰਾਂ ਨਾਲ ਅੰਨ੍ਹੇਵਾਹ ਗੋਲੀਬਾਰੀ ਕੀਤੀ ਅਤੇ ਨਮਾਜ਼ ਲਈ ਆਏ ਲੋਕਾਂ 'ਤੇ ਗ੍ਰਨੇਡ ਸੁੱਟੇ। ਹਮਲਾਵਰਾਂ ਨੇ ਚਰਚ ਦੇ ਮੁੱਖ ਪਾਦਰੀ ਨੂੰ ਅਗਵਾ ਕਰ ਲਿਆ ਹੈ।
ਮੁਸਲਿਮ ਅੱਤਵਾਦੀਆਂ 'ਤੇ ਹਮਲੇ ਦਾ ਸ਼ੱਕ
ਜਿਸ ਚਰਚ 'ਤੇ ਹਮਲਾ ਹੋਇਆ ਸੀ, ਉਸ ਦੀਆਂ ਤਸਵੀਰਾਂ ਇੰਟਰਨੈੱਟ ਮੀਡੀਆ 'ਤੇ ਆਈਆਂ ਹਨ। ਉਨ੍ਹਾਂ ਦੇ ਚਾਰੇ ਪਾਸੇ ਖੂਨ ਹੀ ਖੂਨ ਦਿਖਾਈ ਦਿੰਦਾ ਹੈ। ਹਮਲੇ ਦਾ ਸ਼ੱਕ ਦੇਸ਼ 'ਚ ਸਰਗਰਮ ਮੁਸਲਿਮ ਅੱਤਵਾਦੀਆਂ 'ਤੇ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਘਟਨਾ ਓਂਡੋ ਸੂਬੇ ਦੇ ਪੇਂਟੇਕੋਸਟ ਵਿੱਚ ਸਥਿਤ ਸੇਂਟ ਫਰਾਂਸਿਸ ਕੈਥੋਲਿਕ ਚਰਚ ਦੀ ਹੈ। ਐਤਵਾਰ ਨੂੰ ਉੱਥੇ ਪ੍ਰਾਰਥਨਾ ਸਭਾ ਲਈ ਆਏ ਲੋਕਾਂ 'ਤੇ ਅਣਪਛਾਤੇ ਬੰਦੂਕਧਾਰੀਆਂ ਨੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ। ਕੁਝ ਲੋਕਾਂ ਨੇ ਭੱਜ ਕੇ ਛੁਪ ਕੇ ਆਪਣੇ-ਆਪ ਨੂੰ ਬਚਾਇਆ ਪਰ ਜ਼ਿਆਦਾਤਰ ਲੋਕ ਗੋਲੀਆਂ ਅਤੇ ਗ੍ਰਨੇਡਾਂ ਦਾ ਸ਼ਿਕਾਰ ਹੋ ਗਏ। ਸੁਰੱਖਿਆ ਬਲਾਂ ਨੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ
ਪੋਪ ਫਰਾਂਸਿਸ ਨੇ ਹਮਲੇ 'ਤੇ ਦੁੱਖ ਪ੍ਰਗਟ ਕੀਤਾ ਹੈ
ਪੋਪ ਨੇ ਪੈਂਟੀਕੋਸਟ ਦੇ ਜਸ਼ਨ ਦੌਰਾਨ ਨਾਈਜੀਰੀਆ 'ਚ ਚਰਚ 'ਤੇ ਹੋਏ ਹਮਲੇ ਅਤੇ ਦਰਜਨਾਂ ਸ਼ਰਧਾਲੂਆਂ ਸਮੇਤ ਬੱਚਿਆਂ ਦੀ ਮੌਤ 'ਤੇ ਦੁੱਖ ਪ੍ਰਗਟ ਕੀਤਾ ਹੈ। ਪੋਪ ਨੇ ਹਮਲੇ ਦੌਰਾਨ ਮਾਰੇ ਗਏ ਲੋਕਾਂ ਦੀ ਆਤਮਾ ਦੀ ਸ਼ਾਂਤੀ ਲਈ ਪ੍ਰਾਰਥਨਾ ਕੀਤੀ ਹੈ। ਅਜੇ ਤਕ ਇਹ ਸਪੱਸ਼ਟ ਨਹੀਂ ਹੋਇਆ ਹੈ ਕਿ ਚਰਚ 'ਤੇ ਹਮਲੇ ਪਿੱਛੇ ਕਿਸ ਦਾ ਹੱਥ ਸੀ। ਹਾਲਾਂਕਿ ਨਾਈਜੀਰੀਆ ਦਾ ਜ਼ਿਆਦਾਤਰ ਹਿੱਸਾ ਸੁਰੱਖਿਆ ਮੁੱਦਿਆਂ ਨਾਲ ਜੂਝ ਰਿਹਾ ਹੈ, ਓਂਡੋ ਨੂੰ ਨਾਈਜੀਰੀਆ ਦੇ ਸਭ ਤੋਂ ਸ਼ਾਂਤ ਰਾਜਾਂ ਵਿੱਚੋਂ ਇੱਕ ਵਜੋਂ ਜਾਣਿਆ ਜਾਂਦਾ ਹੈ।
ਨਾਈਜ਼ੀਰੀਆ ਦੇ ਰਾਸ਼ਟਰਪਤੀ ਮੁਹੰਮਦੂ ਬੁਹਾਰੀ ਨੇ ਕਿਹਾ ਕਿ ਸਿਰਫ਼ ਰਾਖਸ਼ ਹੀ ਅਜਿਹੀ ਘਿਨਾਉਣੀ ਹਰਕਤ ਕਰ ਸਕਦੇ ਹਨ। ਘਿਰਣਾ ਤੇ ਹਿੰਸਾ ਨਾਲ ਸਾਡੀਆਂ ਭਾਵਨਾਵਾਂ ਨਹੀਂ ਬਦਲੀਆਂ ਜਾ ਸਕਦੀਆਂ। ਅਸੀਂ ਆਪਣੇ ਪ੍ਰੇਮ ਤੇ ਭਾਈਚਾਰੇ ਨਾਲ ਰਾਖਸ਼ਾਂ ਨੂੰ ਹਰਾ ਦਿਆਂਗੇ। ਓਂਡੋ ਦੇ ਗਵਰਨਰ ਰੋਤਿਮੀ ਅਕੇਰੇਡੋਲੂ ਨੇ ਕਿਹਾ ਕਿ ਸਾਡੇ ਹਿਰਦੇ ਦੁਖ ਨਾਲ ਭਰੇ ਹੋਏ ਹਨ। ਇਹ ਮਨੁੱਖਤਾ ਦੇ ਦੁਸ਼ਮਣਾਂ ਦਾ ਹਮਲਾ ਹੈ।
