ਕੀਵ (ਏਜੰਸੀ) : ਯੂਕਰੇਨ 'ਚ ਜਾਰੀ ਜੰਗ 'ਚ ਸ਼ੁੱਕਰਵਾਰ ਨੂੰ ਭੀੜ ਭਰੇ ਕ੍ਰੈਮੇਟੋਰਸਕ ਰੇਲਵੇ ਸਟੇਸ਼ਨ 'ਤੇ ਹੋਏ ਮਿਜ਼ਾਈਲ ਹਮਲੇ 'ਚ 30 ਲੋਕ ਮਾਰੇ ਗਏ ਜਦਕਿ 87 ਜ਼ਖ਼ਮੀ ਹੋਏ ਹਨ। ਜਿਸ ਸਟੇਸ਼ਨ 'ਤੇ ਹਮਲਾ ਹੋਇਆ ਉਹ ਪੂਰਬੀ ਯੂਕਰੇਨ ਦੇ ਡੋਨੈਸਕ ਇਲਾਕੇ 'ਚ ਹੈ, ਜਿੱਥੇ ਇਨ੍ਹੀਂ ਦਿਨੀਂ ਜ਼ਬਰਦਸਤ ਜੰਗ ਚੱਲ ਰਹੀ ਹੈ। ਸਟੇਸ਼ਨ 'ਚ ਮੌਜੂਦ ਵਧੇਰੇ ਲੋਕ ਸੁਰੱਖਿਅਤ ਸਥਾਨਾਂ 'ਤੇ ਜਾਣ ਲਈ ਰੇਲ ਗੱਡੀ ਦੀ ਉਡੀਕ ਕਰ ਰਹੇ ਸਨ। ਰੂਸ ਨੇ ਆਮ ਲੋਕਾਂ 'ਤੇ ਹੋਏ ਇਸ ਹਮਲੇ 'ਚ ਆਪਣਾ ਹੱਥ ਹੋਣ ਤੋਂ ਇਨਕਾਰ ਕੀਤਾ ਹੈ। ਪਰ ਯੂਕਰੇਨ ਜੰਗ 'ਚ ਬਾਰੀ ਨੁਕਸਾਨ ਦੀ ਗੱਲ ਮੰਨੀ ਹੈ। ਜਦਕਿ ਬੂਚਾ ਕਤਲੇਆਮ ਲਈ ਰੂਸ ਨੂੰ ਘੇਰ ਰਹੇ ਯੂਕਰੇਨ ਨੇ ਕਿਹਾ ਹੈ ਕਿ ਜੰਗਬੰਦੀ ਲਈ ਦੋਵੇਂ ਦੇਸ਼ ਗੱਲਬਾਤ ਕਰ ਰਹੇ ਹਨ। ਨਾਲ ਹੀ ਯੂਕਰੇਨੀ ਰਾਸ਼ਟਰਪਤੀ ਵਲੋਦੋਮੀਰ ਜ਼ੇਲੈਂਸਕੀ ਨੇ ਪੱਛਮੀ ਦੇਸ਼ਾਂ ਨੂੰ ਰੂਸ 'ਤੇ ਵਧੇਰੇ ਪਾਬੰਦੀਆਂ ਤੇ ਲੜਨ ਲਈ ਹਥਿਆਰ ਦੇਣ ਦੀ ਮੰਗ ਵੀ ਕੀਤੀ ਹੈ।
ਡੋਨੈਸਕ ਦੇ ਗਵਰਨਰ ਪਾਵਲੋ ਕਿਰਿਲੈਂਕੋ ਨੇ ਦੱਸਿਆ ਹੈ ਕਿ ਮਿਜ਼ਾਈਲ ਹਮਲੇ ਸਮੇਂ ਰੇਲਵੇ ਸਟੇਸ਼ਨ 'ਤੇ ਹਜ਼ਾਰਾਂ ਲੋਕ ਮੌਜੂਦ ਸਨ। ਕੁਝ ਪਲਾਂ ਦੇ ਅੰਦਰ ਡਿੱਗੀਆਂ ਦੋ ਮਿਜ਼ਈਲਾਂ ਨੇ ਸਟੇਸ਼ਨ 'ਤੇ ਚੀਕ-ਪੁਕਾਰ ਦੇ ਹਾਲਾਤ ਪੈਦਾ ਕਰ ਦਿੱਤੇ, ਉੱਥੇ ਭਾਜੜ ਪੈ ਗਈ। ਤੇਜ਼ ਆਵਾਜ਼ ਵਾਲੇ ਧਮਾਕੇ ਨਾਲ ਉੱਥੇ ਅੱਗ ਲੱਗ ਗਈ ਤੇ ਜਿਸ ਦੀ ਚਪੇਟ 'ਚ ਆ ਕੇ ਬਹੁਤ ਸਾਰੇ ਲੋਕ ਮਾਰੇ ਗਏ ਤੇ ਜ਼ਖ਼ਮੀ ਹੋਏ। ਕੁਝ ਜ਼ਖ਼ਮੀਆਂ ਦੀ ਮੌਤ ਹਸਪਤਾਲ 'ਚ ਹੋਈ, ਬਹੁਤ ਸਾਰੇ ਜ਼ਖ਼ਮੀਆਂ ਦੀ ਸਥਿਤੀ ਗੰਭੀਰ ਹੈ। ਕਿਰਿਲੈਂਕੋ ਨੇ ਹਮਲੇ ਤੋਂ ਬਾਅਦ ਦੀ ਸਟੇਸ਼ਨ ਦੀ ਸਥਿਤੀ ਦੀਆਂ ਕਈ ਤਸਵੀਰਾਂ ਇੰਟਰਨੈੱਟ ਮੀਡੀਆ 'ਤੇ ਜਾਰੀ ਕੀਤੀਆਂ ਹਨ। ਜਦਕਿ ਰੂਸੀ ਰੱਖਿਆ ਮੰਤਰਾਲੇ ਨੇ ਕਿਹਾ ਹੈ ਕਿ ਸਟੇਸ਼ਨ 'ਤੇ ਹਮਲੇ 'ਚ ਜਿਸ ਮਿਜ਼ਾਈਲ ਦਾ ਇਸਤੇਮਾਲ ਹੋਇਆ ਹੈ ਉਨ੍ਹਾਂ ਦਾ ਇਸਤੇਮਾਲ ਯੂਕਰੇਨ ਦੀ ਫ਼ੌਜ ਕਰਦੀ ਹੈ। ਰੂਸੀ ਫ਼ੌਜ ਨੇ ਸ਼ੁੱਕਰਵਾਰ ਨੂੰ ਕ੍ਰੈਮੇਟੋਸਰਕ 'ਚ ਕੋਈ ਹਮਲਾ ਨਹੀਂ ਕੀਤਾ। ਜਦਕਿ ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੈਂਸਕੀ ਨੇ ਫਿਨਲੈਂਡ ਦੀ ਸੰਸਦ ਨੂੰ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਰੇਲਵੇ ਸਟੇਸ਼ਨ 'ਤੇ ਯੂਕਰੇਨ ਦਾ ਇਕ ਵੀ ਫ਼ੌਜੀ ਨਹੀਂ ਸੀ। ਉੱਥੇ ਮੌਜੂਦ ਨਾਗਰਿਕਾਂ 'ਤੇ ਰੂਸੀ ਫ਼ੌਜ ਨੇ ਹਮਲਾ ਕੀਤਾ ਹੈ।
ਕ੍ਰੈਮਟੋਰਸਕ ਸ਼ਹਿਰ ਡੋਨੈਸਕ ਦਾ ਹਿੱਸਾ ਹੈ। ਡੋਨੈਸਕ ਦੇ ਇਕ ਹਿੱਸੇ 'ਤੇ ਰੂਸ ਸਮਰਥਤ ਬਾਗ਼ੀਆਂ ਦਾ 2014 ਤੋਂ ਕਬਜ਼ਾ ਹੈ, ਬਾਕੀ ਦੇ ਹਿੱਸੇ 'ਤੇ ਕਬਜ਼ੇ ਲਈ ਰੂਸੀ ਫ਼ੌਜ ਇਨ੍ਹਾਂ ਦਿਨੀਂ ਲੜ ਰਹੀ ਹੈ। ਇਸ ਦੇ ਗੁਆਂਢ ਦੇ ਲੁਹਾਂਸਕ ਦੇ ਵਧੇਰੇ ਖੇਤਰ 'ਤੇ ਰੂਸੀ ਫ਼ੌਜ ਨੇ ਕਬਜ਼ਾ ਕਰ ਲਿਆ ਹੈ। ਦੋਵਾਂ ਖੇਤਰਾਂ ਦੇ ਇਸ ਹਿੱਸੇ ਨੂੰ ਵੀ ਡੋਨਾਬਸ ਕਹਿੰਦੇ ਹਨ। ਯੂਕਰੇਨ ਦੇ ਪੂਰਬੀ ਦੇ ਦੱਖਣੀ ਹਿੱਸਿਆਂ 'ਚ ਜਿੱਥੇ ਜੰਗ ਤੇਜ਼ ਹੋਈ ਹੈ, ਉੱਥੇ ਉੱਤਰੀ ਹਿੱਸੇ 'ਚ ਰੂਸੀ ਫ਼ੌਜ ਪੂਰੀ ਤਰ੍ਹਾਂ ਹਟ ਗਈ ਹੈ ਤੇ ਉੱਥੇ ਫਿਰ ਤੋਂ ਯੂਕਰੇਨ ਦਾ ਕਬਜ਼ਾ ਹੋ ਗਿਆ ਹੈ। ਯੂਕਰੇਨ ਦੀ ਪ੍ਰਰੋਸੀਕਿਊਟਰ ਜਨਰਲ ਇਰਿਆਨਾ ਵੈਨੇਡਿਕਟੋਵਾ ਨੇ ਦੱਸਿਆ ਹੈ ਕਿ ਬੂਚਾ, ਬੋਰੋਡਿਆਂਕਾ, ਇਰਪਿਨ ਤੇ ਕੁਝ ਹੋਰ ਕਸਬਿਆਂ ਤੋਂ ਹੁਣ ਤੱਕ 650 ਨਾਗਰਿਕਾਂ ਦੀਆਂ ਲਾਸ਼ਾਂ ਬਰਾਮਦ ਹੋਈਆਂ ਹਨ। ਇਨ੍ਹਾਂ 'ਚੋਂ 40 ਲਾਸ਼ਾਂ ਬੱਚਿਆਂ ਦੀਆਂ ਹਨ। ਇਹ ਲਾਸ਼ਾਂ ਕਈ ਹਫ਼ਤੇ ਪੁਰਾਣੀਆਂ ਹਨ ਤੇ ਉਨ੍ਹਾਂ 'ਤੇ ਗੋਲ਼ੀਆਂ ਦੇ ਨਿਸ਼ਾਨ ਹਨ।
ਰੂਸ ਨੇ ਮੰਨਿਆ, ਯੂਕਰੇਨ 'ਚ ਹੋਇਆ ਭਾਰੀ ਨੁਕਸਾਨ
ਕਰੀਬ ਡੇਢ ਮਹੀਨੇ ਤੋਂ ਜਾਰੀ ਯੂਕਰੇਨ ਜੰਗ 'ਚ ਰੂਸ ਨੇ ਪਹਿਲੀ ਵਾਰ ਮੰਨਿਆ ਹੈ ਕਿ ਉਸ ਦੀ ਫ਼ੌਜ ਨੂੰ ਭਾਰੀ ਨੁਕਸਾਨ ਉਠਾਉਣਾ ਪਿਆ ਹੈ। ਪਰ ਮਾਰੇ ਗਏ ਫ਼ੌਜੀਆਂ ਦੀ ਗਿਣਤੀ ਤੇ ਬਰਬਾਦ ਹੋਏ ਹਥਿਆਰਾਂ ਬਾਰੇ ਰੂਸੀ ਰਾਸ਼ਟਰਪਤੀ ਦੇ ਦਫ਼ਤਰ ਕ੍ਰੈਮਲਿਨ ਨੇ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਜਦਕਿ ਯੂਕਰੇਨ ਦਾ ਦਾਅਵਾ ਹੈ ਕਿ ਜੰਗ 'ਚ ਉਸ ਦੀ ਫ਼ੌਜ ਨੇ ਅਜੇ ਤੱਕ 18 ਹਜ਼ਾਰ ਤੋਂ ਵੱਧ ਰੂਸੀ ਫ਼ੌਜੀਆਂ ਨੂੰ ਮਾਰ ਸੁੱਟਿਆ ਹੈ ਤੇ 150 ਤੋਂ ਵੱਧ ਜੰਗੀ ਜਹਾਜ਼ ਤੇ ਕਰੀਬ 700 ਟੈਂਕ ਨਸ਼ਟ ਕੀਤੇ ਹਨ। ਕ੍ਰੈਮਲਿਨ ਦੇ ਬੁਲਾਰੇ ਦਿਮਿਤਰੀ ਪੇਸਕੋਵ ਨੇ ਕਿਹਾ ਕਿ ਜੰਗ ਦੇ ਮੈਦਾਨ 'ਚ ਸਾਡੀ ਫ਼ੌਜ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੀ ਹੈ ਤੇ ਕਾਰਵਾਈ 'ਚ ਉਸ ਨੂੰ ਪੂਰੀ ਕਾਮਯਾਬੀ ਵੀ ਮਿਲ ਰਹੀ ਹੈ। ਉਮੀਦ ਹੈ ਕਿ ਕਾਰਵਾਈ ਆਪਣੇ ਟੀਚੇ ਨੂੰ ਹਾਸਲ ਕਰਦੇ ਹੋਏ ਛੇਤੀ ਪੂਰੀ ਹੋਵੇਗੀ। ਕ੍ਰੈਮਲਿਨ ਦੇ ਬੁਲਾਰੇ ਨੇ ਕਿਹਾ ਕਿ ਰੂਸ ਨੇ ਸਦਭਾਵਨਾ ਪ੍ਰਗਟ ਕਰਦੇ ਹੋਏ ਕੀਵ ਤੇ ਚਾਰਨੀਹੀਵ ਤੋਂ ਆਪਣੇ ਫ਼ੌਜੀ ਹਟਾਏ ਹਨ, ਯੂਕਰੇਨ ਨੂੰ ਵੀ ਗੱਲਬਾਤ 'ਚ ਸੁਹਿਰਦਤਾ ਦਿਖਾਉਂਦੇ ਹੋਏ ਰੂਸ ਦੀਆਂ ਚਿੰਤਾਵਾਂ ਨੂੰ ਦੂਰ ਕਰਨਾ ਚਾਹੀਦਾ ਹੈ।
ਈਯੂ ਤੇ ਬਿ੍ਟੇਨ ਨੇ ਵੀ ਪੁਤਿਨ ਦੀਆਂ ਧੀਆਂ 'ਤੇ ਲਾਈ ਪਾਬੰਦੀ
ਯੂਰਪੀ ਯੂਨੀਅਨ (ਈਯੂ) ਤੇ ਬਿ੍ਟੇਨ ਨੇ ਵੀ ਸ਼ੁੱਕਰਵਾਰ ਨੂੰ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੀਆਂ ਦੋਵਾਂ ਧੀਆਂ ਮਾਰੀਆ ਪੁਤਿਨ ਤੇ ਕੈਟਰੀਨਾ ਤਿਖੋਨੋਵਾ 'ਤੇ ਪਾਬੰਦੀ ਲਗਾ ਦਿੱਤੀ। ਇਨ੍ਹਾਂ ਪਾਬੰਦੀਆਂ ਤਹਿਤ ਉਨ੍ਹਾਂ ਦੀ ਬਿ੍ਟੇਨ ਤੇ ਯੂਰਪੀ ਯੂਨੀਅਨ ਦੇ 27 ਮੈਂਬਰ ਦੇਸ਼ਾਂ 'ਚ ਮੌਜੂਦ ਜਾਇਦਾਦ ਜ਼ਬਤ ਕਰ ਲਈ ਜਾਵੇਗੀ ਤੇ ਉੱਥੇ ਉਨ੍ਹਾਂ ਦੀ ਯਾਤਰਾ 'ਤੇ ਪਾਬੰਦੀ ਹੋਵੇਗੀ। ਇਸ ਤੋਂ ਪਹਿਲਾਂ ਬੁੱਧਵਾਰ ਨੂੰ ਅਮਰੀਕਾ ਨੇ ਪੁਤਿਨ ਦੀਆਂ ਧੀਆਂ 'ਤੇ ਪਾਬੰਦੀ ਲਗਾਈ ਸੀ। ਅਮਰੀਕਾ, ਬਿ੍ਟੇਨ ਤੇ ਈਯੂ ਨੇ ਪਾਬੰਦੀਆਂ ਤਹਿਤ ਅਜੇ ਤੱਕ ਕਰੀਬ 360 ਅਰਬ ਡਾਲਰ (27 ਲੱਖ ਕਰੋੜ ਰੁਪਏ ਤੋਂ ਵੱਧ) ਦੀ ਰੂਸੀ ਜਾਇਦਾਦ ਜ਼ਬਤ ਕੀਤੀ ਹੈ।
ਯੂਐੱਨਐੱਚਆਰਸੀ ਤੋਂ ਰੂਸ ਦੀ ਮੁਅੱਤਲੀ ਚੰਗਾ ਕਦਮ : ਬਾਇਡਨ
ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਸੰਯੁਕਤ ਰਾਸ਼ਟਰ ਮਨੁੱਖੀ ਅਧਿਕਾਰ ਪ੍ਰਰੀਸ਼ਦ (ਯੂਐੱਨਐੱਚਆਰਸੀ) ਤੋਂ ਰੂਸ ਦੀ ਮੁਅੱਤਲੀ ਨੂੰ ਕੌਮਾਂਤਰੀ ਭਾਈਚਾਰੇ ਦਾ ਚੰਗਾ ਕਦਮ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਯੂਕਰੇਨ 'ਤੇ ਮਨਮਰਜ਼ੀ ਨਾਲ ਹਮਲਾ ਕਰਨ ਵਾਲੇ ਰੂਸ ਨੂੰ ਕੌਮਾਂਤਰੀ ਤੌਰ 'ਤੇ ਖਾਰਜ ਕਰਨ ਵਾਲਾ ਕਦਮ ਹੈ। ਯੂਕਰੇਨ 'ਚ ਰੂਸੀ ਫ਼ੌਜ ਗੰਭੀਰ ਕਿਸ ਦੇ ਜੰਗੀ ਅਪਰਾਧ ਕਰ ਰਹੀ ਹੈ। ਇਸ ਹਾਲਤ 'ਚ ਰੂਸ ਦਾ ਮਨੁੱਖੀ ਅਧਿਕਾਰ ਪ੍ਰਰੀਸ਼ਦ 'ਚ ਬਣੇ ਰਹਿਣ ਦਾ ਕੋਈ ਮਤਲਬ ਨਹੀਂ ਸੀ। ਜ਼ਿਕਰਯੋਗ ਹੈ ਕਿ ਅਮਰੀਕੀ ਮਤੇ 'ਤੇ ਸੰਯੁਕਤ ਰਾਸ਼ਟਰ ਮਹਾਸਭਾ ਨੇ ਵੀਰਵਾਰ ਨੂੰ ਬਹੁਮਤ ਦੇ ਆਧਾਰ 'ਤੇ ਫ਼ੈਸਲਾ ਲੈਂਦੇ ਹੋਏ ਰੂਸ ਨੂੰ ਮਨੁੱਖੀ ਅਧਿਕਾਰ ਪ੍ਰਰੀਸ਼ਦ ਦੀ ਮੈਂਬਰਸ਼ਿਪ ਤੋਂ ਮੁਅੱਤਲ ਕਰ ਦਿੱਤਾ ਸੀ।
