ਢਾਕਾ ਦੀਆਂ ਝੁੱਗੀਆਂ 'ਚ ਅੱਗ ਲੱਗਣ ਨਾਲ 50 ਹਜ਼ਾਰ ਲੋਕ ਬੇਘਰ

Sun, 18 Aug 2019 06:22 PM (IST)

ਢਾਕਾ (ਏਜੰਸੀ) : ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਵਿਚ ਦੇਰ ਰਾਤ ਇਕ ਵੱਡੀ ਝੁੱਗੀ ਬਸਤੀ 'ਚ ਅੱਗ ਲੱਗਣ ਨਾਲ ਕਰੀਬ 50 ਹਜ਼ਾਰ ਲੋਕ ਬੇਘਰ ਹੋ ਗਏ। ਮੀਰਪੁਰ ਦੇ ਚਲੰਤਿਕਾ ਇਲਾਕੇ 'ਚ ਸਥਿਤ ਇਸ ਝੁੱਗੀ ਬਸਤੀ ਵਿਚ ਲੱਗੀ ਅੱਗ ਨਾਲ 15 ਹਜ਼ਾਰ ਝੁੱਗੀਆਂ ਸੜ ਕੇ ਸੁਆਹ ਹੋ ਗਈਆਂ। ਅੱਗ ਨਾਲ ਕਈ ਲੋਕ ਝੁਲਸ ਗਏ ਪਰ ਕਿਸੇ ਦੀ ਮੌਤ ਦੀ ਖ਼ਬਰ ਨਹੀਂ ਹੈ।

ਪੁਲਿਸ ਇੰਚਾਰਜ ਗੁਲਾਮ ਰਬਾਨੀ ਨੇ ਕਿਹਾ ਕਿ ਬਕਰੀਦ ਦਾ ਤਿਉਹਾਰ ਮਨਾਉਣ ਲਈ ਝੁੱਗੀ ਵਾਸੀ ਆਪਣੇ ਪਿੰਡ ਗਏ ਹੋਏ ਸਨ, ਨਹੀਂ ਤਾਂ ਨੁਕਸਾਨ ਜ਼ਿਆਦਾ ਹੁੰਦਾ। ਜ਼ਿਆਦਾਤਰ ਝੁੱਗੀਆਂ ਪਲਾਸਟਿਕ ਨਾਲ ਢਕੀਆਂ ਹੋਣ ਕਾਰਨ ਅੱਗ ਤੇਜ਼ੀ ਨਾਲ ਫੈਲੀ ਅਤੇ ਦੇਖਦੇ ਹੀ ਦੇਖਦੇ ਪੂਰੇ ਇਲਾਕੇ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ। ਫਾਇਰ ਬਿ੍ਗੇਡ ਮੁਲਾਜ਼ਮਾਂ ਨੇ ਛੇ ਘੰਟੇ ਦੀ ਸਖ਼ਤ ਮਿਹਨਤ ਤੋਂ ਬਾਅਦ ਅੱਗ 'ਤੇ ਕਾਬੂ ਪਾਇਆ ਪਰ ਉਦੋਂ ਤਕ ਦਿਹਾੜੀ ਕਰ ਕੇ ਗੁਜ਼ਾਰਾ ਕਰਨ ਵਾਲੇ ਲੋਕਾਂ ਦੇ ਆਸ਼ੀਆਨੇ ਪੂਰੀ ਤਰ੍ਹਾਂ ਤਬਾਹ ਹੋ ਗਏ ਸਨ।