ਫਿਲਪੀਨ 'ਚ ਡੁੱਬੀਆਂ ਤਿੰਨ ਕਿਸ਼ਤੀਆਂ, 25 ਮੌਤਾਂ

Sun, 04 Aug 2019 07:11 PM (IST)

ਮਨੀਲਾ (ਆਈਏਐੱਨਐੱਸ) : ਫਿਲਪੀਨ 'ਚ ਖ਼ਰਾਬ ਮੌਸਮ ਕਾਰਨ ਸ਼ਨਿਚਰਵਾਰ ਨੂੰ ਇਕ ਤੋਂ ਬਾਅਦ ਇਕ ਤਿੰਨ ਕਿਸ਼ਤੀਆਂ ਸਮੁੰਦਰ 'ਚ ਡੁੱਬ ਗਈਆਂ। ਇਨ੍ਹਾਂ ਹਾਦਸਿਆਂ 'ਚ 25 ਲੋਕਾਂ ਦੀ ਮੌਤ ਹੋ ਗਈ। ਪੁਲਿਸ ਵਿਭਾਗ ਦੇ ਬਿ੍ਗੇਡੀਅਰ ਜਨਰਲ ਰੇਨੇ ਪਾਮੁਸਪੁਸਨ ਨੇ ਐਤਵਾਰ ਨੂੰ ਇੱਥੇ ਦੱਸਿਆ ਕਿ ਇਨ੍ਹਾਂ ਹਾਦਸਿਆਂ 'ਚ ਛੇ ਲੋਕ ਹਾਲੇ ਵੀ ਲਾਪਤਾ ਹਨ ਜਿਨ੍ਹਾਂ ਦੀ ਤਲਾਸ਼ ਜਾਰੀ ਹੈ। ਰਾਹਤ ਤੇ ਬਚਾਅ ਦਲ ਨੇ 59 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ।

ਤੇਜ਼ ਬਾਰਿਸ਼ ਤੇ ਖ਼ਰਾਬ ਮੌਸਮ ਕਾਰਨ ਇਹ ਤਿੰਨੋਂ ਹਾਦਸੇ ਇਲੋਇਲੋ ਸ਼ਹਿਰ ਤੇ ਗੁਈਮਾਰਾਸ ਸੂਬੇ ਵਿਚਕਾਰ ਦੇ ਸਮੁੰਦਰੀ ਖੇਤਰ 'ਚ ਹੋਏ। ਫਿਲਪੀਨ 'ਚ ਹਰ ਸਾਲ ਖ਼ਰਾਬ ਮੌਸਮ ਦੀ ਵਜ੍ਹਾ ਨਾਲ ਕਿਸ਼ਤੀ ਹਾਦਸਿਆਂ 'ਚ ਦਰਜਨਾਂ ਲੋਕਾਂ ਦੀ ਮੌਤ ਹੋ ਜਾਂਦੀ ਹੈ। ਹਾਦਸੇ ਦੀ ਵਜ੍ਹਾ ਕਿਸ਼ਤੀ ਦੀ ਸਹੀ ਸਾਂਭ ਸੰਭਾਲ ਨਾ ਹੋਣਾ ਤੇ ਸਮਰੱਥਾ ਤੋਂ ਵੱਧ ਯਾਤਰੀ ਸਵਾਰ ਹੋਣਾ ਸ਼ਾਮਲ ਹੈ। ਸਾਲ 1987 'ਚ ਫਿਲਪੀਨ ਤੱਟ 'ਤੇ ਤੇਲ ਟੈਂਕਰ ਨਾਲ ਟਕਰਾ ਕੇ ਯਾਤਰੀਆਂ ਨੂੰ ਢੋਣ ਵਾਲੀ ਇਕ ਵੱਡੀ ਕਿਸ਼ਤੀ ਡੁੱਬ ਗਈ ਸੀ। ਉਸ ਹਾਦਸੇ 'ਚ ਚਾਰ ਹਜ਼ਾਰ ਤੋਂ ਵੱਧ ਲੋਕ ਮਾਰੇ ਗਏ ਸਨ।