ਨਵੀਂ ਦਿੱਲੀ (ਪੀਟੀਆਈ) : ਦੁਨੀਆ ਦੀ ਸਾਬਕਾ ਨੰਬਰ ਇਕ ਖਿਡਾਰਨ ਸਾਇਨਾ ਨੇਹਵਾਲ ਆਪਣੇ ਅੰਤਰਰਾਸ਼ਟਰੀ ਕਰੀਅਰ ਵਿਚ ਪਹਿਲੀ ਵਾਰ ਸੱਟਾਂ ਕਾਰਨ ਵਿਸ਼ਵ ਬੈਡਮਿੰਟਨ ਚੈਂਪੀਅਨਸ਼ਿਪ ਵਿਚ ਹਿੱਸਾ ਨਹੀਂ ਲਵੇਗੀ। ਲੰਡਨ ਓਲੰਪਿਕ ਦੀ ਕਾਂਸੇ ਦਾ ਮੈਡਲ ਜੇਤੂ ਸਾਇਨਾ ਨੇ ਵਿਸ਼ਵ ਚੈਂਪੀਅਨਸ਼ਿਪ ਵਿਚ ਇਕ ਸਿਲਵਰ ਤੇ ਇਕ ਕਾਂਸੇ ਦਾ ਮੈਡਲ ਜਿੱਤਿਆ ਹੈ ਜਦਕਿ ਅੱਠ ਵਾਰ ਕੁਆਰਟਰ ਫਾਈਨਲ ਵਿਚ ਪੁੱਜੀ ਹੈ। ਉਹ ਗ੍ਰੋਇਨ 'ਚ ਖਿਚਾਅ ਤੇ ਗੋਡੇ ਦੀ ਸੱਟ ਨਾਲ ਜੂਝ ਰਹੀ ਹੈ। ਵਿਸ਼ਵ ਚੈਂਪੀਅਨਸ਼ਿਪ ਸਪੇਨ ਦੇ ਹੁਏਲਵਾ ਵਿਚ 12 ਤੋਂ 19 ਦਸੰਬਰ ਤਕ ਖੇਡੀ ਜਾਵੇਗੀ।
ਸਾਇਨਾ ਦੇ ਪਤੀ ਤੇ ਸਾਥੀ ਖਿਡਾਰੀ ਪੀ ਕਸ਼ਯਪ ਨੇ ਕਿਹਾ ਕਿ ਸਾਇਨਾ ਨੂੰ ਵਿਸ਼ਵ ਚੈਂਪੀਅਨਸ਼ਿਪ ਤੋਂ ਨਾਂ ਵਾਪਸ ਲੈਣਾ ਪਿਆ ਕਿਉਂਕਿ ਉਹ ਸੱਟ ਨਾਲ ਜੂਝ ਰਹੀ ਹੈ। ਉਹ ਸਮੇਂ 'ਤੇ ਫਿੱਟ ਨਹੀਂ ਹੋ ਸਕੇਗੀ। ਅਕਤੂਬਰ ਵਿਚ ਡੈਨਮਾਰਕ ਵਿਚ ਥਾਮਸ ਤੇ ਉਬੇਰ ਕੱਪ ਦੌਰਾਨ ਸਾਇਨਾ ਨੂੰ ਸੱਟ ਕਾਰਨ ਬਾਹਰ ਹੋਣਾ ਪਿਆ ਸੀ। ਫਰੈਂਚ ਓਪਨ ਵਿਚ ਵੀ ਉਹ ਪਹਿਲੇ ਗੇੜ ਦੀ ਦੂਜੀ ਗੇਮ ਤੋਂ ਬਾਅਦ ਨਹੀਂ ਖੇਡ ਸਕੀ। ਕਸ਼ਯਪ ਨੇ ਕਿਹਾ ਕਿ ਉਨ੍ਹਾਂ ਨੂੰ ਉਬੇਰ ਕੱਪ ਵਿਚ ਗ੍ਰੋਇਨ ਦੀ ਸੱਟ ਲੱਗੀ ਸੀ। ਡੈਨਮਾਰਕ ਵਿਚ ਉਹ ਠੀਕ ਸੀ ਪਰ ਸੱਟ ਪੂਰੀ ਤਰ੍ਹਾਂ ਠੀਕ ਨਹੀਂ ਹੋਈ ਸੀ। ਫਰੈਂਚ ਓਪਨ ਖੇਡਦੇ ਸਮੇਂ ਸੱਟ ਵਧ ਗਈ ਤੇ ਦਰਦ ਹੋਣ ਲੱਗਾ। ਸਾਇਨਾ ਨੇ 2006 ਤੋਂ ਬਾਅਦ ਤੋਂ ਹਮੇਸ਼ਾ ਵਿਸ਼ਵ ਚੈਂਪੀਅਨਸ਼ਿਪ ਵਿਚ ਹਿੱਸਾ ਲਿਆ ਹੈ। ਉਸ ਨੇ 2015 ਵਿਚ ਸਿਲਵਰ ਮੈਡਲ ਜਿੱਤਿਆ ਸੀ ਜਦ ਉਹ ਫਾਈਨਲ ਵਿਚ ਸਪੇਨ ਦੀ ਕੈਰੋਲੀਨਾ ਮਾਰਿਨ ਹੱਥੋਂ ਹਾਰ ਗਈ ਸੀ। ਦੋ ਸਾਲ ਬਾਅਦ ਗਲਾਸਗੋ ਵਿਚ ਉਸ ਨੇ ਕਾਂਸੇ ਦਾ ਮੈਡਲ ਜਿੱਤਿਆ ਸੀ।
ਸੀਨੀਅਰ ਰੈਂਕਿੰਗ ਟੂਰਨਾਮੈਂਟ 'ਚ ਵਾਪਸੀ ਕਰਨਗੇ ਕਸ਼ਯਪ
ਪਿਛਲੇ ਦੋ ਸਾਲ ਤੋਂ ਸਾਇਨਾ ਸੱਟਾਂ ਨਾਲ ਜੂਝ ਰਹੀ ਹੈ ਤੇ ਟੋਕੀਓ ਓਲੰਪਿਕ ਕੁਆਲੀਫਿਕੇਸ਼ਨ ਵੀ ਨਹੀਂ ਖੇਡ ਸਕੀ। ਵਿਸ਼ਵ ਰੈਂਕਿੰਗ ਵਿਚ ਹੁਣ ਉਹ 23ਵੇਂ ਸਥਾਨ 'ਤੇ ਹੈ। ਆਪਣੇ ਕਰੀਅਰ ਵਿਚ ਖ਼ੁਦ ਸੱਟਾਂ ਨਾਲ ਜੂਝਦੇ ਰਹੇ ਕਸ਼ਯਪ ਚੇਨਈ ਤੇ ਹੈਦਰਾਬਾਦ ਵਿਚ ਸੀਨੀਅਰ ਰੈਂਕਿੰਗ ਟੂਰਨਾਮੈਂਟ ਰਾਹੀਂ ਵਾਪਸੀ ਕਰਨਗੇ।
