ਸਟਾਫ ਰਿਪੋਰਟਰ, ਸ੍ਰੀ ਮੁਕਤਸਰ ਸਾਹਿਬ : ਭਾਰਤੀ ਰੇਲਵੇ ਨੂੰ ਭਾਰਤ ਦੀ ਲਾਈਫ ਲਾਈਨ ਕਿਹਾ ਜਾਂਦਾ ਹੈ। ਭਾਰਤ ਵਿਚ ਸਫਰ ਲਈ ਜ਼ਿਆਦਾਤਰ ਲੋਕ ਰੇਲ ਗੱਡੀ ਦੀ ਵਰਤੋਂ ਕਰਦੇ ਹਨ। ਇਹੀ ਕਾਰਨ ਹੈ ਕਿ ਭਾਰਤੀ ਰੇਲਵੇ ਨੈੱਟਵਰਕ ਦੀ ਗਿਣਤੀ ਦੁਨੀਆ ਦੇ ਵੱਡੇ ਰੇਲ ਨੈਟਵਰਕਾਂ 'ਚ ਆਉਦੀ ਹੈ। ਇੱਥੇ ਰੋਜ਼ਾਨਾਂ ਲੱਖਾ ਲੋਕ ਇਸ ਵਿਚ ਸਫਰ ਕਰਦੇ ਹਨ। ਭਾਰਤ ਦੀ ਅਰਥ ਵਿਵਸਥਾ ਨੂੰ ਮਜ਼ਬੂਤ ਕਰਨ ਵਿਚ ਭਾਰਤੀ ਰੇਲਵੇ ਦਾ ਵੱਡਾ ਹੱਥ ਹੈ। ਇਸ ਗੱਲ ਨੂੰ ਧਿਆਨ ਵਿਚ ਰੱਖਦੇ ਹੋਏ ਵੱਡੇ-ਵੱਡੇ ਰੇਲਵੇ ਕੋਰੀਡੋਰ ਬਣਾਏ ਜਾ ਰਹੇ ਹਨ ਜਿੱਥੇ ਸਿਰਫ ਮਾਲ ਗੱਡੀਆਂ ਹੀ ਚੱਲਣਗੀਆਂ। ਇਸ ਸਿਲਸਿਲੇ ਵਿਚ ਤੁਹਾਨੂੰ ਅੱਜ ਜਾਣੂ ਕਰਵਾ ਰਹੇ ਹਾਂ ਕਿ ਸ੍ਰੀ ਮੁਕਤਸਰ ਸਾਹਿਬ ਜੋ ਜ਼ਿਲ੍ਹਾ ਹੈੱਡ ਕੁਆਟਰ ਅਤੇ ਆਦਰਸ਼ ਰੇਲਵੇ ਸਟੇਸ਼ਨ ਹੋਣ ਦੇ ਨਾਲ ਨਾਲ ਦਸਵੇਂ ਪਾਤਸ਼ਾਹਿ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੀ ਚਰਨ ਛੋ ਪ੍ਰਰਾਪਤ ਧਰਤੀ ਹੈ ਅਤੇ ਇਹ ਰੇਲਵੇ ਸਟੇਸ਼ਨ ਕੋਟਕਪੂਰਾ–ਫਾਜ਼ਿਲਕਾ ਰੇਲ ਸੈਕਸ਼ਨ ਵਿਚ ਸਥਿਤ ਹੈ ਜਿੱਥੇ ਫਾਟਕ ਨੰਬਰ ਏ-29 ਅਤੇ ਬੀ-30 ਦਾ ਫਾਸਲਾ 700 ਮੀਟਰ ਹੈ। ਸਾਲ 1902 ਵਿਚ ਰੇਲਵੇ ਵਿਭਾਗ ਨੇ ਇਸ ਸਟੇਸ਼ਨ ਨੂੰ ਦੋ ਹਿੱਸਿਆਂ ਵਿਚ ਵੰਡ ਦਿੱਤਾ (250 ਮੀਟਰ ਰੇਲਵੇ ਗੁਡਸ ਯਾਰਡ ਅਤੇ 250 ਮੀਟਰ ਪੈਸੰਜਰ ਪਲੇਟਫਾਰਮ ਮੀਟਰ ਗੇਜ ਸਮੇਂ ਦੇ ਬਣਾਏ ਹੋਏ)। ਸਮੇਂ-ਸਮੇਂ ਸਿਰ ਰੇਲ ਨੈੱਟਵਰਕ ਵਿਚ ਵਾਧਾ ਹੁੰਦਾ ਗਿਆ। 1902 ਵਿਚ ਮੁਕਤਸਰ ਟਾਊਨ ਦੀ ਅਬਾਦੀ 6400 ਦੇ ਲਗਭਗ ਸੀ ਜੋ ਕਿ ਹੁਣ ਵੱਧ ਕੇ ਕਰੀਬ 150000 ਹੋ ਗਈ। 250 ਮੀਟਰ ਵਾਲੀ ਮਾਲ ਗੱਡੀ ਦੀ ਲੰਬਾਈ ਵੱਧ ਕੇ 690 ਮੀਟਰ ਅਤੇ ਸਵਾਰੀ ਗੱਡੀ ਦੀ ਲੰਬਾਈ 500 ਮੀਟਰ ਤੋਂ 640 ਮੀਟਰ ਤੱਕ ਅਤੇ ਸਟੀਮ ਇੰਜਣ ਤੋਂ ਡੀਜਲ ਇੰਜਣ ਅਤੇ ਡੀਜਲ ਇੰਜਣ ਤੋਂ ਇਲੈਕਟ੍ਰੀਕਲ ਇੰਜਣ ਅਤੇ ਮੀਟਰ ਗੇਜ ਤੋਂ ਬਰਾਡ ਗੇਜ ਲਾਈਨ ਹੋ ਗਈ ਪਰ ਕੋਟਕਪੂਰਾ ਫਾਜ਼ਲਿਕਾ ਰੇਲ ਸੈਕਸ਼ਨ ਤੇ ਬਰੀਵਾਲਾ–ਮੁਕਤਸਰ ਅਤੇ ਲੱਖੇਵਾਲੀ ਦੇ ਮੁਸਾਫਰ ਪਲੇਟਫਾਰਮਾਂ 'ਚ ਕੋਈ ਵਾਧਾ ਨਹੀਂ ਕੀਤਾ ਗਿਆ ਕਿਉਂਕਿ ਇੱਥੇ ਸਪੇਸ ਉਪਲਬਧ ਨਹੀ ਸੀ, ਜਿਸ ਕਾਰਨ ਫਾਜ਼ਲਿਕਾ ਸ੍ਰੀ ਮੁਕਤਸਰ ਸਾਹਿਬ ਨੂੰ ਪੰਜਾਬ ਦੀ ਰਾਜਧਾਨੀ ਚੰਡੀਗੜ ਅਤੇ ਦੇਸ਼ ਦੀ ਰਾਜਧਾਨੀ ਦਿੱਲੀ ਨਾਲ ਰੇਲ ਨੈਟਵਰਕ ਨਾਲ ਨਹੀ ਜੋੜਿਆ ਜਾ ਸਕਿਆ। ਨਾਰਦਨ ਰੇਲਵੇ ਪੈਸੰਜਰ ਸਮਤਿ ਦੇ ਪ੍ਰਧਾਨ ਵਿਨੋਦ ਕੁਮਾਰ ਭਵਨੀਆਂ ਅਤੇ ਜਨਰਲ ਸਕੱਤਰ ਸ਼ਾਮ ਲਾਲ ਗੋਇਲ ਨੇ ਰੇਲ ਮੰਤਰੀ ਭਾਰਤ ਸਰਕਾਰ, ਜਨਰਲ ਮੈਨੇਜਰ ਉਤਰੀ ਰੇਲਵੇ ਅਤੇ ਮੰਡਲ ਰੇਲਵੇ ਮੈਨੇਜਰ ਫਿਰੋਜਪੁਰ ਨੂੰ ਪੱਤਰ ਲਿਖ ਕੇ ਮੰਗ ਕੀਤੀ ਹੈ ਕਿ ਮੁਕਤਸਰ ਰੇਲਵੇ ਸਟੇਸ਼ਨ ਤੋਂ ਰੇਲਵੇ ਗੁਡਸ ਯਾਰਡ ਤਬਦੀਲ ਕਰਕੇ ਬਲਮਗੱੜ ਰੇਲਵੇ ਸਟੇਸ਼ਨ ਤੇ ਤਬਦੀਲ ਕੀਤਾ ਜਾਵੇ ਅਤੇ ਪੁਰਾਣਾ 250 ਰੇਲਵੇ ਗੁਡਸ ਯਾਰਡ ਜੋ ਬੇਕਾਰ ਪਿਆ ਹੈ ਦੀ ਥਾਂ 'ਤੇ ਬੁੜਾ ਗੁੱਜਰ ਰੋਡ ਤੋਂ ਜਲਾਲਾਬਾਦ ਰੋਡ ਫਾਟਕ ਤੱਕ 640 ਮੀਟਰ ਲੰਬੇ ਦੋ ਮੁਸਾਫਰ ਪਲੇਟਫਾਰਮ ਬਣਾਏ ਜਾਣ। ਇਸ ਨਾਲ ਹੀ ਪੇਂਡੂ ਹਾਲਟ ਸਟੇਸ਼ਨ ਜਿਵੇਂ ਕਿ ਭਾਗਸਰ ਅਦਿ ਦੇ ਪਲੇਟਫਾਰਮ ਉੱਚੇ ਕੀਤੇ ਜਾਣ ਤਾਂ ਜੋ ਮੁਸਾਫਰ/ ਬਜ਼ੁਰਗ ਸੋਖੇ ਚੜ੍ਹ ਉਤਰ ਸਕਣ।
