ਆਰਜ਼ੀ ਪੁਲ ਦੇ ਰਿਹਾ ਹਾਦਸਿਆਂ ਨੂੰ ਸੱਦਾ

Sat, 22 Jan 2022 04:17 PM (IST)

ਹਰਦੀਪ ਧੰਮੀ ਨੰਗਲ, ਨਿਹਾਲ ਸਿੰਘ ਵਾਲਾ

ਪਿੰਡ ਬੀੜ ਰਾਊਕੇ ਕੋਲ ਸੇਮ ਦਾ ਨਵਾਂ ਬਣ ਰਿਹਾ ਪੁਲ ਸਬੰਧਿਤ ਮਹਿਕਮੇ ਦੀ ਧੀਮੀ ਚਾਲ ਕਾਰਨ ਠੰਡ ਅਤੇ ਖਰਾਬ ਮੌਸਮ ਦੇ ਦਿਨਾਂ ਦੌਰਾਨ ਪੈ ਰਹੀ ਧੁੰਦ ਦੌਰਾਨ ਗੰਭੀਰ ਹਾਦਸਿਆਂ ਨੂੰ ਸੱਦਾ ਦੇ ਰਿਹਾ ਹੈ। ਇਸ ਨਵੇਂ ਬਣਾਏ ਜਾ ਰਹੇ ਪੁਲ ਦੇ ਨੇੜੇ ਮਿੱਟੀ ਪਾ ਕੇ ਆਰਜੀ ਪੁਲ ਬਣਾਇਆ ਗਿਆ ਸੀ ਜੋ ਕਿ ਅਕਸਰ ਹੀ ਟੁੱਟਿਆ ਰਹਿੰਦਾ ਹੈ। ਇਸ ਨਾਲ ਧੁੰਦ ਦੇ ਦਿਨਾਂ ਵਿੱਚ ਗੰਭੀਰ ਹਾਦਸਿਆਂ ਦਾ ਖੌਫ ਬਣਿਆ ਰਹਿੰਦਾ ਹੈ। ਇੱਥੇ ਥੋੜੇ ਦਿਨ ਬਾਅਦ ਹੀ ਭਾਰੀ ਵਾਹਨ ਖੁੱਭ ਜਾਣ ਨਾਲ ਆਵਾਜਾਈ ਵੱਡੀ ਪੱਧਰ ਤੇ ਪ੍ਰਭਾਵਿਤ ਹੁੰਦੀ ਹੈ, ਜਿਸ ਕਾਰਨ ਰਾਹੀਆਂ ਨੂੰ ਦਸ ਕਿਲੋਮੀਟਰ ਦਾ ਵਾਧੂ ਸਫ਼ਰ ਕਰਨਾ ਪੈਂਦਾ ਹੈ। ਇਸ ਸਬੰਧੀ ਡਾ. ਹਰ ਗੁਰਪ੍ਰਤਾਪ ਸਿੰਘ, ਐਡਵੋਕੇਟ ਜੁਪਿੰਦਰ ਸਿੰਘ ਸਿੱਧੂ, ਸਤਿੰਦਰ ਜੀਤ ਕੁੱਕੂ, ਸੈਕਟਰੀ ਬਗੀਚਾ ਸਿੰਘ, ਰਾਜਵਿੰਦਰ ਰੌਂਤਾ ਆਦਿ ਆਦਿ ਪਤਵੰਤਿਆਂ ਅਤੇ ਹਲਕੇ ਦੇ ਲੋਕਾਂ ਨੇ ਮੰਗ ਕੀਤੀ ਕਿ ਇਸ ਸੜਕ ਉਪਰ ਲੰਘਣ ਵਾਲੇ ਭਾਰੀ ਵਾਹਨਾਂ ਦੀ ਆਮਦ ਬੰਦ ਕੀਤੀ ਜਾਵੇ ਅਤੇ ਨਵੇਂ ਪੁਲ ਨੂੰ ਜਲਦੀ ਮੁਕੰਮਲ ਕਰ ਕੇ ਆਵਾਜਾਈ ਸੁਚਾਰੂ ਢੰਗ ਨਾਲ ਚਾਲੂ ਕੀਤੀ ਜਾਵੇ।