ਸੰਜੀਵ ਗੁਪਤਾ, ਜਗਰਾਓਂ : ਪਿੰਡ ਮਲਕ ਵਿਚ ‘ਚਿੱਟੇ’ ਨੇ ਇਕ ਹੋਰ ਜ਼ਿੰਦਗੀ ਲੀਲ ਲਈ। ਘਰ ਵਿਚ ‘ਚਿੱਟੇ’ ਦੀ ਸਿਰਿੰਜ ਭਰ ਕੇ ਲਗਾਉਣ ਤੋਂ ਬਾਅਦ 23 ਸਾਲਾ ਕਰਮਜੀਤ ਸਿੰਘ ਦੀ ਮੌਤ ਹੋ ਗਈ। ਪਿੰਡ ਵਿਚ ‘ਚਿੱਟੇ’ ਨਾਲ ਹੋਈਆਂ ਕਈ ਮੌਤਾਂ ਤੋਂ ਬਾਅਦ ਅੱਜ ਦੀ ਇਸ ਘਟਨਾ ਨੇ ਵੀ ਪੂਰੇ ਪਿੰਡ ਨੂੰ ਝੰਜੋੜ ਕੇ ਰੱਖ ਦਿੱਤਾ। ‘ਚਿੱਟੇ’ ਦੇ ਬੋਲਬਾਲੇ ਦੇ ਚੱਲਦਿਆਂ ਪਿੰਡ ਵਿਚ ਨੌਜਵਾਨਾਂ ਦੀਆਂ ਮੌਤਾਂ ਦਾ ਕਾਰਵਾਂ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ।
ਜਾਣਕਾਰੀ 23 ਸਾਲਾ ਕਰਮਜੀਤ ਸਿੰਘ ਘਰ ਵਿਚ ‘ਚਿੱਟੇ’ ਦਾ ਟੀਕਾ ਲਗਾ ਰਿਹਾ ਸੀ। ਜ਼ਿਆਦਾ ਡੋਜ਼ ਹੋਣ ਕਾਰਨ ਉਸ ਦੀ ਮੌਤ ਹੋ ਗਈ। ਉਸ ਦੀ ਮੌਤ ਦੇ ਨਾਲ ਹੀ ਘਰ ਵਿਚ ਮਾਤਮ ਛਾ ਗਿਆ। ਸਸਕਾਰ ਮੌਕੇ ਉਸ ਦੀ ਮਾਂ ਦਾ ਵਿਰਲਾਪ ਦੇਖਿਆ ਨਹੀਂ ਜਾ ਰਿਹਾ ਸੀ। ਜਿਸ ਪੁੱਤ ਦੇ ਵਿਆਹ ਦੀ ਮਾਂ ਉਡੀਕ ਕਰ ਰਹੀ ਸੀ, ਅੱਜ ਉਸ ਦੀ ਮ੍ਰਿਤਕ ਦੇਹ ਦੇਖ ਕੇ ਉਸ ਦਾ ਦਰਦ ਬਿਆਨ ਨਹੀਂ ਕੀਤਾ ਜਾ ਸਕਦਾ। ਮਾਂ ਨੇ ਫਿਰ ਵੀ ਬੜੇ ਚਾਵਾਂ ਨਾਲ ਆਪਣੇ ਪੁੱਤ ਦੀ ਮ੍ਰਿਤਕ ਦੇਹ ’ਤੇ ਸਸਕਾਰ ਤੋਂ ਪਹਿਲਾਂ ਸਿਹਰਾ ਸਜਾਇਆ ਤਾਂ ਹਰ ਅੱਖ ਭਿੱਜ ਗਈ।
ਪਿੰਡ ਮਲਕ ’ਚ ਨਸ਼ੇ ਕਾਰਨ 13ਵੀਂ ਮੌਤ
ਕਰਮਜੀਤ ਦੀ ਮੌਤ ਨੂੰ ਲੈ ਕੇ ਅੱਜ ਹਰ ਪਿੰਡ ਵਾਸੀ ਦੀ ਜ਼ੁਬਾਨ ’ਤੇ ਨਸ਼ਿਆਂ ਦੇ ਬੋਲਬਾਲੇ ਦੀ ਗੱਲ ਸੀ। ਮ੍ਰਿਤਕ ਦੇ ਵੱਡੇ ਭਰਾ ਪ੍ਰਦੀਪ ਸਿੰਘ ਨੇ ਕਿਹਾ ਕਿ ਇਹ ਨਸ਼ੇ ਕਾਰਨ ਕੋਈ ਪਹਿਲੀ ਮੌਤ ਨਹੀਂ ਹੋਈ ਹੈ, ਬਲਕਿ ਇਸ ਤੋਂ ਪਹਿਲਾਂ ਵੀ ਪਿੰਡ ਵਿਚ ‘ਚਿੱਟੇ’ ਕਾਰਨ 12 ਨੌਜਵਾਨਾਂ ਦੀ ਮੌਤ ਹੋ ਚੁੱਕੀ ਹੈ ਜਿਸ ਦਾ ਕਾਰਨ ਪਿੰਡ ਵਿਚ ਸ਼ਰੇਆਮ ‘ਚਿੱਟਾ’ ਮਿਲ ਰਿਹਾ ਹੈ। ਕਦੇ ਤੰਗੀ ਹੋ ਵੀ ਜਾਵੇ ਤਾਂ ਚਿੱਟੇ ਦੀ ਲਤ ਵਾਲੇ ਜਗਰਾਓਂ ਤੋਂ ‘ਚਿੱਟਾ’ ਲੈ ਆਉਂਦੇ ਹਨ।
