ਵਿਜੇ ਸੋਨੀ, ਫਗਵਾਡ਼ਾ : ਡਿਊਟੀ ਵਿਚ ਕੋਤਾਹੀ ਅਤੇ ਭ੍ਰਿਸ਼ਟ ਤਰੀਕੇ ਨਾਲ ਕਨਵੈਂਸ ਡੀਡ ਰਾਹੀਂ ਸਰਕਾਰੀ ਪ੍ਰਾਪਰਟੀ ਅਯੋਗ ਲਾਭਪਾਤਰੀਆਂ ਨੂੰ ਟਰਾਂਸਫਰ ਕਰਨ ਦੇ ਮਾਮਲੇ ਵਿਚ ਕੀਤੀ ਗਈ ਵਿਜੀਲੈਂਸ ਇਨਕੁਆਰੀ ਦੀ ਪਡ਼ਤਾਲ ਵਿਚ ਮੁਲਜ਼ਮ ਪਾਏ ਜਾਣ ’ਤੇ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਵਿਰੁੱਧ ਮੁਕੱਦਮਾ ਦਰਜ ਕਰ ਕੇ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਇਸ ਸਬੰਧੀ ਸੀਨੀਅਰ ਕਪਤਾਨ ਪੁਲਿਸ ਵਿਜੀਲੈਂਸ ਬਿਊਰੋ ਜਲੰਧਰ ਰੇਂਜ ਨੇ ਦੱਸਿਆ ਕਿ ਇੰਸਪੈਕਟਰ ਪਵਨ ਕੁਮਾਰ ਵਿਜੀਲੈਂਸ ਬਿਉਰੋ ਸਬ ਯੂਨਿਟ ਫਗਵਾਡ਼ਾ, ਅਸ਼ਵਨੀ ਕੁਮਾਰ ਡੀਐੱਸਪੀ ਵਿਜੀਲੈਂਸ ਬਿਊਰੋ ਯੂਨਿਟ ਕਪੂਰਥਲਾ ਵੱਲੋਂ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਜੋ ਕਿ ਹੁਣ ਐਗਜੀਕਿਊਟਿਵ ਅਫ਼ਸਰ ਅਰਬਨ ਡਿਵੈਲਪਮੈਂਟ ਜਲੰਧਰ ਹਨ, ਨੂੰ ਨਗਰ ਨਿਗਮ ਫਗਵਾਡ਼ਾ 2016-17 ਦੀ ਤਾਇਨਾਤੀ ਦੌਰਾਨ ਆਪਣੀ ਡਿਊਟੀ ਵਿਚ ਕੁਤਾਹੀ ਅਤੇ ਭ੍ਰਿਸ਼ਟ ਤਰੀਕੇ ਨਾਲ ਕਨਵੈਂਸ ਡੀਡ ਰਾਹੀਂ ਸਰਕਾਰੀ ਪ੍ਰਾਪਰਟੀ ਅਯੋਗ ਲਾਭਪਾਤਰੀਆਂ ਨੂੰ ਟਰਾਂਸਫਰ ਕਰਨ ਦੇ ਮਾਮਲੇ ਵਿਚ ਮੁਕੱਦਮਾ ਦਰਜ ਕਰ ਕੇ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਡੀਐੱਸਪੀ ਅਸਵਨੀ ਕੁਮਾਰ ਨੇ ਦੱਸਿਆ ਕਿ ਵਿਜੀਲੈਂਸ ਇਨਕੁਆਰੀ ਦੀ ਪਡ਼ਤਾਲ ਤੋਂ ਪਾਇਆ ਗਿਆ ਕਿ 14-12-2016 ਦੇ ਪੰਜਾਬ ਸਰਕਾਰ ਦੇ ਨੋਟੀਫਿਕੇਸ਼ਨ ਅਨੁਸਾਰ ਪੰਜਾਬ ਨਗਰ ਨਿਗਮ ਦੀਆਂ ਰਿਹਾਇਸ਼ੀ ਅਤੇ ਹੋਰ ਪ੍ਰਾਪਰਟੀਜ਼ ਦੇ ਕਿਰਾਏਦਾਰ ਲਾਇਸੈਂਸ ਹੋਲਡਰਾਂ ਨੂੰ ਮਾਲਕੀ ਦੇ ਹੱਕ ਦਿੱਤੇ ਜਾਣੇ ਸਨ, ਨੋਟੀਫਿਕੇਸ਼ਨ ਵਿਚ ਸ਼ਰਤਾਂ ਇਹ ਸਨ ਕਿ ਨਗਰ ਨਿਗਮ ਮਾਲਕੀ ਵਾਲੀ ਜਗ੍ਹਾ ਰਿਹਾਇਸ਼ੀ ਪ੍ਰਾਪਰਟੀ ਦਾ ਏਰੀਆ 150 ਵਰਗ ਗਜ ਅਤੇ ਹੋਰ ਪ੍ਰਾਪਰਟੀ ਦੁਕਾਨਾਂ ਦਾ ਏਰੀਆ 50 ਵਰਗ ਗਜ ਹੋਵੇ ਅਤੇ ਇਨ੍ਹਾਂ ਪ੍ਰਾਪਰਟੀ ’ਤੇ ਬੈਠੇ ਕਿਰਾਏਦਾਰ ਲਾਈਸੈਂਸ ਹੋਲਡਰ ਸਬ ਲੇਟੀਜ਼ ਦੇ ਕਬਜ਼ੇ ਦਾ ਅਰਸਾ ਘੱਟਂੋ-ਘੱਟ 20 ਸਾਲ ਦਾ ਹੋਵੇ ਤਾਂ ਉਕਤ ਲਾਭਪਾਤਰੀ ਦੀ ਦਰਖ਼ਾਸਤ ਨੂੰ ਉਪਰੋਕਤ ਨੋਟੀਫ਼ਿਕੇਸ਼ਨ ਅਨੁਸਾਰ ਮਾਲਕੀ ਦੇ ਹੱਕ ਦਿੱਤੇ ਜਾਣ ਲਈ ਵਿਚਾਰ ਕੀਤਾ ਜਾ ਸਕਦਾ ਹੈ। ਪਰ ਜਿਸ ਬਿਨੈਕਾਰ ਨੇ ਨਗਰ ਨਿਗਮ ਦੀ ਪ੍ਰਾਪਰਟੀ ਤੇ ਇਨਕ੍ਰੋਚਮੈਂਟ ਕੀਤੀ ਹੋਵੇ ਉਸ ਨੂੰ ਮਾਲਕੀ ਦੇ ਹੱਕ ਨਹੀਂ ਦਿੱਤੇ ਜਾ ਸਕਦੇ ਹਨ। ਨਗਰ ਨਿਗਮ ਫਗਵਾਡ਼ਾ ਅਧੀਨ ਆਉਂਦੇ ਏਰੀਏ ਵਿਚ ਇਸ ਨੋਟੀਫਿਕੇਸ਼ਨ ਸਬੰਧੀ ਪਡ਼ਤਾਲ ਲਈ ਇਕ ਕਮੇਟੀ ਬਣਾਈ ਗਈ ਸੀ, ਜਿਸ ਵਿਚ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਨੂੰ ਸਮਰੱਥ ਅਧਿਕਾਰੀ ਲਗਾਇਆ ਗਿਆ ਸੀ। ਨਗਰ ਨਿਗਮ ਫਗਵਾਡ਼ਾ ਦੀ ਵਿਜੀਲੈਂਸ ਬਿਊਰੋ ਵੱਲੋਂ ਕੀਤੀ ਗਈ ਪਡ਼ਤਾਲ ਤੋਂ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਵੱਲੋਂ ਆਪਣੀ ਮਿਊਂਸੀਪਲ ਕਾਰਪੋਰੇਸ਼ਨ ਫਗਵਾਡ਼ਾ ਵਿਖੇ ਤਾਇਨਾਤੀ ਦੌਰਾਨ ਫਗਵਾਡ਼ਾ ਦੀਆਂ 49 ਅਲਗ-ਅਲਗ ਪ੍ਰਾਪਰਟੀਜ਼ ਜਿਨ੍ਹਾਂ ’ਚੋਂ ਬਹੁਤ ਕਮਰਸ਼ੀਅਲ ਸਨ ਤੇ ਕਿਰਾਏਦਾਰਾਂ ਲਾਇਸੈਂਸ ਹੋਲਡਰਾਂ ਨੂੰ ਸਰਕਾਰੀ ਸ਼ਰਤਾਂ ਮੁਤਾਬਿਕ ਆਯੋਜਿਤ ਹੁੰਦੇ ਹੋਏ 49 ਕਮਰਸ਼ੀਅਲ ਸਾਈਟ ਅਯੋਗ ਲਾਭਪਾਤਰੀਆਂ ਨੂੰ ਲੈਟਰ ਆਫ ਇਨਟੈਂਟ ਜਾਰੀ ਕਰਦੇ ਹੋਏ ਬੇਬਾਕੀ ਸਰਟੀਫਿਕੇਟ ਜਾਰੀ ਕਰ ਦਿੱਤਾ ਜਿਸ ਦੇ ਆਧਾਰ ’ਤੇ ਮਾਰਚ 2017 ਤਕ ਉਕਤ 49 ਲਾਭਪਾਤਰੀਆਂ ਨੂੰ ਸਾਜ਼ਬਾਜ਼ ਹੋ ਕੇ ਭ੍ਰਿਸ਼ਟ ਤਰੀਕੇ ਨਾਲ ਕਨਵੈਂਸ ਡੀਡ ਵੀ ਜਾਰੀ ਕਰ ਦਿੱਤੀਆਂ ਗਈਆਂ। ਅਜਿਹਾ ਕਰ ਕੇ ਸ਼ੱਕੀ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਨੇ ਬਤੌਰ ਜਨ ਸੇਵਕ ਹੁੰਦੇ ਹੋਏ ਆਪਣੀ ਡਿਊਟੀ ਬੇਈਮਾਨੀ ਅਤੇ ਗਲਤ ਤਰੀਕੇ ਨਾਲ ਅਣਉਚਿਤ ਲਾਭ ਰਿਸ਼ਵਤ ਲੈਣ ਦੀ ਕੋਸ਼ਿਸ਼ ਵਿਚ ਨਿਭਾਈ ਅਤੇ ਅਯੋਗ ਲਾਭਪਾਤਰੀਆਂ ਨੂੰ ਰਿਸ਼ਵਤ ਦੇਣ ਲਈ ਉਕਸਾਇਆ ਹੈ ਅਤੇ ਸਰਕਾਰ ਦੀ ਨਿਰਧਾਰਤ ਪਾਲਿਸੀ ਦੀਆਂ ਸ਼ਰਤਾਂ ਦੀ ਉਲੰਘਣਾ ਕਰਕੇ ਸਰਕਾਰ ਨੂੰ ਵਿੱਤੀ ਨੁਕਸਾਨ ਪਹੁੰਚਾਇਆ। ਜਿਸ ਤਹਿਤ ਆਦਰਸ਼ ਕੁਮਾਰ ਸਹਾਇਕ ਕਮਿਸ਼ਨਰ ਨਗਰ ਨਿਗਮ ਫਗਵਾਡ਼ਾ ਵਿਰੁੱਧ ਧਾਰਾ 7 ਅਤੇ 12 ਪੀਸੀ ਅੇਕਟ 1988 ਐਕਟ 2018 ਤਹਿਤ ਥਾਣਾ ਵਿਜੀਲੈਂਸ ਬਿਊਰੋ ਜਲੰਧਰ ਵਿਖੇ ਦਰਜ ਰਜਿਸਟਰ ਕੀਤਾ ਗਿਆ, ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰ ਕੇ ਤਫਤੀਸ਼ ਜਾਰੀ ਹੈ।
