ਸੁਖਦੇਵ ਸਿੰਘ, ਬਟਾਲਾ: ਦੋ ਪੇ੍ਮੀ ਜਿਨ੍ਹਾਂ ਦੀ ਮੰਗਣੀ ਤਾਂ ਹੋ ਗਈ, ਪਰ ਭਾਰਤ ਤੇ ਪਾਕਿਸਤਾਨ ਦੀ ਸਰਹੱਦ ਦੋਵਾਂ ਦੇ ਵਿਆਹ ’ਚ ਅੜਿੱਕਾ ਬਣ ਗਈ ਹੈ। ਪਿਛਲੇ ਚਾਰ ਸਾਲ ਤੋਂ ਇਹ ਦੋਵੇਂ ਪੇ੍ਰਮੀ ਤੇ ਇਹਨਾਂ ਦੇ ਪਰਿਵਾਰਕ ਮੈਂਬਰ ਇਨ੍ਹਾਂ ਦੋਵਾਂ ਦਾ ਵਿਆਹ ਕਰਵਾਉਣ ਲਈ ਵੀਜ਼ੇ ਦੀ ਉਡੀਕ ’ਚ ਨਜ਼ਰਾਂ ਵਿਛਾ ਕੇ ਬੈਠੇ ਹਨ, ਪਰ ਵੀਜ਼ਾ ਨਾ ਮਿਲਣ ਕਾਰਨ ਦੋਵੇਂ ਪਰਿਵਾਰ ਨਿਰਾਸ਼ ਹਨ।
ਮਾਮਲਾ ਹੈ ਪੰਜਾਬ ਦੇ ਬਟਾਲਾ ’ਚ ਰਹਿੰਦੇ ਨਮਨ ਲੂਥਰਾ ਤੇ ਪਕਿਸਤਾਨ ’ਚ ਲਾਹੌਰ ਦੇ ਸਮਨਾਬਾਦ ਦੀ ਰਹਿਣ ਵਾਲੀ ਸ਼ਹਿਨੀਲ ਦਾ। 2015 ’ਚ ਦੋਵਾਂ ’ਚ ਪਿਆਰ ਹੁੰਦਾ ਹੈ ਅਤੇ 2016 ’ਚ ਦੋਵਾਂ ਦੇ ਪਰਿਵਾਰਾਂ ਦੀ ਸਹਿਮਤੀ ਨਾਲ ਮੰਗਣੀ ਹੋ ਜਾਂਦੀ ਹੈ। ਪਰ ਪਿਛਲੇ ਛੇ ਸਾਲ ਤੋਂ ਦੋਵੇਂ ਹੀ ਆਪਣੇ ਵਿਆਹ ਹੋਣ ਦੀ ਉਡੀਕ ’ਚ ਬੈਠੇ ਹਨ ਅਤੇ ਇਹਨਾ ਦੇ ਵਿਆਹ ਦੇ ਰਾਹ ’ਚ ਰੋੜਾ ਬਣਿਆ ਹੈ ਵੀਜ਼ਾ। ਬਟਾਲਾ ਦੇ ਰਹਿਣ ਵਾਲੇ ਵਕਾਲਤ ਦੀ ਪੜ੍ਹਾਈ ਕਰ ਰਹੇ ਨਮਨ ਲੂਥਰਾ ਨੇ ਦੱਸਿਆ ਕਿ ਉਸਦੇ ਨਾਨਕੇ ਪਾਕਿਸਤਾਨ ਦੇ ਲਾਹੌਰ ਵਿਚ ਹਨ ਤੇ ਉਹ ਆਪਣੀ ਮਾਂ ਨਾਲ ਪਹਿਲਾ 2016 ’ਚ ਲਾਹੌਰ ਆਪਣੇ ਨਾਨਕੇ ਗਿਆ ਸੀ, ਜਿਥੇ ਸ਼ਹਿਨੀਲ ਉਸ ਨੂੰ ਪਸੰਦ ਆ ਗਈ ਤੇ ਉਸ ਤੋਂ ਬਾਅਦ ਉਸਨੇ ਆਪਣੇ ਦਿਲ ਦੀ ਗੱਲ ਆਪਣੇ ਪਰਿਵਾਰ ਨਾਲ ਕੀਤੀ। ਪਰਿਵਾਰ ਨੇ ਸ਼ਹਿਨੀਲ ਦੇ ਪਰਿਵਾਰ ਨਾਲ ਸਾਡੇ ਰਿਸ਼ਤੇ ਦੀ ਗੱਲ ਚਲਾਈ। ਥੋੜ੍ਹੀ ਮੁਸ਼ਕਿਲ ਤੋਂ ਬਾਅਦ 2016 ’ਚ ਸਾਡੀ ਮੰਗਣੀ ਹੋ ਗਈ। ਉਸ ਤੋਂ ਬਾਅਦ ਵਿਆਹ ਕਰਵਾਉਣ ਦੇ ਲਈ ਵੀਜ਼ੇ ਅਪਲਾਈ ਕੀਤੇ ਤਾਂ ਸ਼ਹਿਨੀਲ ਨੂੰ ਵੀਜ਼ਾ ਨਹੀਂ ਮਿਲਿਆ। ਨਮਨ ਨੇ ਦੱਸਿਆ ਕਿ ਦੁਬਾਰਾ ਅਪਲਾਈ ਕੀਤਾ ਤਾਂ ਉਸ ਵੇਲੇ ਕੋਵਿਡ ਕਾਲ ਆ ਗਿਆ ਤਦ ਵੀ ਵੀਜ਼ਾ ਰੁਕ ਗਿਆ ਤੇ ਦੁਬਾਰਾ ਦਸੰਬਰ 2021 ’ਚ ਸ਼ਹਿਨੀਲ ਦੇ ਪਰਿਵਾਰ ਨੇ ਵੀਜ਼ਾ ਅਪਲਾਈ ਕੀਤਾ, ਪਰ ਫਿਰ ਵੀਜ਼ਾ ਨਹੀਂ ਮਿਲਿਆ।
ਉਸਨੇ ਦੱਸਿਆ ਕਿ ਮਈ 2022 ’ਚ ਫਿਰ ਵੀਜ਼ਾ ਅਪਲਾਈ ਕੀਤਾ, ਉਹ ਵੀ ਰੱਦ ਕਰ ਦਿੱਤਾ ਗਿਆ। ਨਮਨ ਲੂਥਰਾ ਨੇ ਦੱਸਿਆ ਕਿ ਉਹ ਵੀਜ਼ਾ ਲੈ ਕੇ ਪਾਕਿਸਤਾਨ ਜਾ ਕੇ ਆਪਣਾ ਵਿਆਹ ਕਰ ਸਕਦਾ ਹੈ, ਪਰ ਸ਼ਹਿਨੀਲ ਨੂੰ ਜਿੰਨੀ ਦੇਰ ਤਕ ਵੀਜ਼ਾ ਨਹੀਂ ਮਿਲਦਾ, ਉਹ ਭਾਰਤ ਮੇਰੇ ਕੋਲ ਨਹੀਂ ਆ ਸਕਦੀ। ਉਥੇ ਹੀ ਨਮਨ ਲੂਥਰਾ ਦੀ ਮਾਤਾ ਯੋਗਿਤਾ ਲੂਥਰਾ ਨੇ ਕਿਹਾ ਕਿ ਉਹ ਖ਼ੁਦ ਪਾਕਿਸਤਾਨ ਲਾਹੌਰ ਤੋਂ ਵਿਆਹ ਕੇ ਭਾਰਤ ਆਈ ਸੀ ਤੇ ਸਾਡਾ ਪਰਿਵਾਰ ਲਾਹੌਰ ਤੋਂ ਆਉਂਦਾ ਰਹਿੰਦਾ ਹੈ, ਇਸੇ ਦੇ ਚਲਦੇ ਹੀ ਨਮਨ ਨੂੰ ਸ਼ਹਿਨੀਲ ਪਸੰਦ ਆ ਗਈ। ਉਸ ਨੇ ਕਿਹਾ ਕਿ ਪਿਛਲੇ 6 ਸਾਲ ਤੋਂ ਵੀਜ਼ੇ ਦੀ ਉਡੀਕ ’ਚ ਮੇਰੇ ਪੁੱਤਰ ਦੇ ਸ਼ਗਨ ਵਿਹਾਰ ਕਰਨ ਦੇ ਚਾਅ ਵੀ ਮੇਰੇ ਮਨ ਅੰਦਰ ਹੀ ਦੱਬੇ ਪਏ ਹਨ। ਉਹ ਸਾਰੇ ਚਾਅ ਵੀਜ਼ਾ ਨਾ ਮਿਲਣ ਕਾਰਨ ਅਜੇ ਅਧੂਰੇ ਹੀ ਪਏ ਹਨ। ਉਹਨਾਂ ਕਿਹਾ ਕਿ ਸਰਕਾਰ ਤੋਂ ਮੰਗ ਕੀਤੀ ਕਿ ਸ਼ਹਿਨੀਲ ਨੂੰ ਜਲਦੀ ਵੀਜ਼ਾ ਦਿੱਤਾ ਜਾਵੇ ਤਾਂਕਿ ਇਹ ਦੋਵੇਂ ਆਪਣੇ ਵਿਆਹੁਤਾ ਜੀਵਨ ਦੀ ਸ਼ੁਰੂਆਤ ਕਰ ਸਕਣ।
ਕਰਤਾਰਪੁਰ ਸਾਹਿਬ ਕੋਰੀਡੋਰ ਨੇ ਮਿਲਾਇਆ ਦੋ ਵਾਰ
ਨਮਨ ਲੂਥਰਾ ਨੇ ਦੱਸਿਆ ਕਿ ਜਦੋਂ ਤੋਂ ਕਰਤਾਰਪੁਰ ਸਾਹਿਬ ਕੋਰੀਡੋਰ ਬਣਿਆ ਹੈ। ਉਸ ਵੇਲੇ ਤੋਂ ਉਹ ਦੋਵੇਂ ਤੇ ਪਰਿਵਾਰਿਕ ਮੈਂਬਰ ਕਰਤਾਰਪੁਰ ਸਾਹਿਬ ਜਾ ਕੇ ਦੋ ਵਾਰ ਆਪਸ ਵਿਚ ਮਿਲੇ ਹਨ। ਨਮਨ ਨੇ ਭਾਰਤ ਸਰਕਾਰ ਨੂੰ ਅਪੀਲ ਕੀਤੀ ਕਿ ਇਸ ਵਾਰ ਸ਼ਹਿਨੀਲ ਨੂੰ ਵੀਜ਼ਾ ਦੇ ਦਿੱਤਾ ਜਾਵੇ, ਤਾਂਕਿ ਉਹ ਦੋਵੇਂ ਆਪਣੇ ਵਿਆਹੁਤਾ ਜੀਵਨ ਦੀ ਸ਼ੁਰੂਆਤ ਕਰ ਸਕਣ।
