ਯਾਦਵਿੰਦਰ ਸਿੰਘ ਭੁੱਲਰ, ਬਰਨਾਲਾ : ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੇ ਆਪਣੇ ਸਿਹਤ ਮੰਤਰੀ ਡਾ. ਵਿਜੈ ਸਿੰਗਲਾ ਨੂੰ ਭ੍ਰਿਸ਼ਟਚਾਰ ਦੇ ਦੋਸ਼ ਲਗਾ ਕੇ ਜਿੱਥੇ ਕੈਬਨਿਟ 'ਚੋਂ ਬਰਖਾਸਤ ਕੀਤਾ ਉੱਥੇ ਹੀ ਕਾਨੂੰਨੀ ਕਾਰਵਾਈ ਕਰਦਿਆਂ ਗ੍ਰਿਫਤਾਰੀ ਕਰਵਾਇਆ। ਗੌਰ ਹੋਵੇ ਕਿ ਸਿਹਤ ਮੰਤਰੀ ਦੀ ਪੋਲ ਖੋਲ੍ਹਣ ਵਾਲਾ ਬਰਨਾਲੇ ਦਾ ਹੀ ਜੰਮਪਲ ਹੈ।
ਬਰਨਾਲਾ ਖੇਤਰ ਦੀ ਧਰਤੀ ਨੂੰ ਕ੍ਰਾਂਤੀਕਾਰੀਆਂ ਦੀ ਧਰਤੀ ਮੰਨਿਆ ਜਾਂਦਾ ਹੈ। ਵੱਡੇ ਅੰਦੋਲਨਾਂ 'ਚ ਬਰਨਾਲਾ ਖੇਤਰ ਦੇ ਕ੍ਰਾਂਤੀਕਾਰੀ ਲੋਕਾਂ ਦਾ ਮਹੱਤਵਪੂਰਨ ਯੋਗਦਾਨ ਰਿਹਾ ਹੈ। ਹਾਲਹੀ 'ਚ ਪੰਜਾਬ ਦੇ ਅਹੁਦੇ ਤੋਂ ਹਟਾਏ ਸਿਹਤ ਮੰਤਰੀ ਵਿਜੈ ਸਿੰਗਲਾ ਕਰੱਪਸ਼ਨ ਕਾਂਡ ਦਾ ਖੁਲਾਸਾ ਕਰਨ ਵਾਲੇ ਦਾ ਸਬੰਧ ਵੀ ਬਰਨਾਲਾ ਦੀ ਧਰਤੀ ਨਾਲ ਹੈ। ਸਿਹਤ ਮੰਤਰੀ ਵੱਲੋਂ ਟੈਂਡਰਾਂ 'ਚੋਂ ਕਮਿਸ਼ਨ ਮੰਗਣ ਦੀ ਕਹਾਣੀ ਦਾ ਖੁਲਾਸਾ ਕਰਨ ਵਾਲੇ ਅਫ਼ਸਰ ਰਜਿੰਦਰ ਸਿੰਘ ਦਾ ਸਬੰਧ ਬਰਨਾਲਾ ਜ਼ਿਲ੍ਹੇ ਨਾਲ ਹੈ। ਰਜਿੰਦਰ ਸਿੰਘ ਜੋ ਇਸ ਵੇਲੇ ਪੰਜਾਬ ਸਿਹਤ ਸਿਸਟਮਜ ਨਿਗਮ 'ਚ ਅਫਸਰ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ, ਬਰਨਾਲਾ ਜ਼ਿਲ੍ਹੇ ਦੇ ਪਿੰਡ ਖੁੱਡੀ ਕਲਾਂ ਦੇ ਜੰਮਪਲ ਹਨ। ਰਜਿੰਦਰ ਸਿੰਘ ਨੇ ਆਪਣੀ ਮੁੱਢਲੀ ਪੜ੍ਹਾਈ ਖੁੱਡੀ ਕਲਾਂ ਦੇ ਸਕੂਲ ਤੋਂ ਹੀ ਕੀਤੀ ਪਰ ਉਹ ਨੌਕਰੀ ਦੇ ਕਾਰਨ ਪਿੰਡ ਤੋਂ ਸ਼ਿਫਟ ਕਰ ਗਏ ਸਨ, ਜੋ ਅੱਜਕੱਲ੍ਹ ਮੁਹਾਲੀ ਵਿਖੇ ਰਹਿ ਰਹੇ ਹਨ। ਉਹ ਇਸੇ ਸਾਲ ਦੇ ਨਵੰਬਰ ਮਹੀਨੇ 'ਚ ਸੇਵਾਮੁਕਤ ਵੀ ਹੋ ਰਹੇ ਹਨ। ਆਮ ਤੌਰ 'ਤੇ ਸੇਵਾਮੁਕਤੀ ਦੇ ਨੇੜੇ ਜਾ ਕੇ ਸਰਕਾਰੀ ਅਫ਼ਸਰ ਤੇ ਮੁਲਾਜ਼ਮ ਕੰਮ ਘੱਟ ਕਰਨ ਲੱਗਦੇ ਹਨ ਤਾਂ ਜੋ ਉਨ੍ਹਾਂ ਤੋਂ ਕੋਈ ਗਲਤ ਕੰਮ ਨਾ ਹੋ ਜਾਵੇ ਤੇ ਉਹ ਸੁਖੀ ਸਾਂਦੀ ਆਪਣੇ ਘਰ ਚਲੇ ਜਾਣ ਪਰ ਰਾਜਿੰਦਰ ਸਿੰਘ ਨੇ ਆਪਣੀ ਸੇਵਾਮੁਕਤੀ ਤੋਂ ਸਿਰਫ਼ ਕੁਝ ਮਹੀਨੇ ਪਹਿਲਾਂ ਇੱਕ ਕੈਬਨਿਟ ਮੰਤਰੀ ਦੇ ਭ੍ਰਿਸ਼ਟਾਚਾਰ ਦਾ ਭਾਂਡਾ ਭੰਨਦਿਆਂ ਮੁੱਖ ਸ਼ਿਕਾਇਤਕਰਤਾ ਦੀ ਭੂਮਿਕਾ ਵੀ ਕਬੂਲ ਕੀਤੀ। ਸੂਤਰਾਂ ਅਨੁਸਾਰ ਜਦੋਂ ਰਜਿੰਦਰ ਸਿੰਘ ਨੇ ਸਿਹਤ ਮੰਤਰੀ ਦੇ ਕਮਿਸ਼ਨ ਦੀ ਗੱਲ ਆਪਣੇ ਸੀਨੀਅਰ ਅਧਿਕਾਰੀ ਨਾਲ ਕੀਤੀ, ਜਿਸ ਨੇ ਸਾਰਾ ਮਾਮਲਾ ਮੁੱਖ ਮੰਤਰੀ ਦੇ ਧਿਆਨ 'ਚ ਲਿਆਂਦਾ ਤਾਂ ਮੁੱਖ ਮੰਤਰੀ ਵੱਲੋਂ ਬੁਣੇ ਸਟਿੰਗ ਆਪ੍ਰੇਸ਼ਨ ਦੇ ਜਾਲ ਦੌਰਾਨ ਰਜਿੰਦਰ ਸਿੰਘ ਨੇ ਹੀ ਸਿਹਤ ਮੰਤਰੀ ਦੀ ਆਡੀਓ ਤਿਆਰ ਕੀਤੀ । ਇਸੇ ਆਡੀਓ ਕਲਿੱਪ ਦੇ ਆਧਾਰ 'ਤੇ ਹੀ ਮੁੱਖ ਮੰਤਰੀ ਨੇ ਸਿਹਤ ਮੰਤਰੀ ਖ਼ਿਲਾਫ਼ ਵੱਡਾ ਐਕਸ਼ਨ ਲਿਆ।