ਸਟੇਟ ਬਿਊਰੋ, ਕੋਲਕਾਤਾ : ਕੋਲਕਾਤਾ ਦੇ ਸਿਆਲਦਹ ਸਟੇਸ਼ਨ ਨੇੜੇ ਬੁੱਧਵਾਰ ਨੂੰ ਦੋ ਲੋਕਲ ਟ੍ਰੇਨਾਂ ਆਪਸ ’ਚ ਟਕਰਾ ਗਈਆਂ। ਦੋਵਾਂ ਟ੍ਰੇਨਾਂ ਦੀ ਹੌਲੀ ਰਫ਼ਤਾਰ ਕਾਰਨ ਵੱਡਾ ਹਾਦਸਾ ਹੋਣੋਂ ਟਲ਼ ਗਿਆ ਤੇ ਕੋਈ ਜਾਨ-ਮਾਲ ਦੀ ਹਾਨੀ ਨਹੀਂ ਹੋਈ। ਸਾਰੇ ਯਾਤਰੀ ਤੇ ਚਾਲਕ ਸੁਰੱਖਿਅਤ ਹਨ। ਉੱਧਰ, ਇਸ ਘਟਨਾ ਤੋਂ ਬਾਅਦ ਲੋਕਲ ਟ੍ਰੇਨ ਦੇ ਯਾਤਰੀਆਂ ਤੇ ਸਿਆਲਦਹ ਸਟੇਸ਼ਨ ’ਤੇ ਹਫੜਾ-ਦਫੜੀ ਮਚ ਗਈ। ਘਟਨਾ ਦੀ ਜਾਣਕਾਰੀ ਮਿਲਦੇ ਹੀ ਸਿਆਲਦਹ ਦੇ ਡੀਆਰਐੱਮ ਐੱਸਪੀ ਸਿੰਘ ਸਣੇ ਰੇਲਵੇ ਦੇ ਸੀਨੀਅਰ ਅਧਿਕਾਰੀ ਮੌਕੇ ’ਤੇ ਪੁੱਜੇ।
ਦੱਸਿਆ ਜਾ ਰਿਹਾ ਹੈ ਕਿ ਇਹ ਹਾਦਸਾ ਉਦੋਂ ਵਾਪਰਿਆ ਜਦੋਂ ਇਕ ਖ਼ਾਲੀ ਲੋਕਲ ਟ੍ਰੇਨ ਸਿਆਲਦਹ ਸਟੇਸ਼ਨ ਤੋਂ ਕਾਰਸ਼ੈੱਡ ਵੱਲ ਜਾ ਰਹੀ ਸੀ ਤੇ ਦੂਜੇ ਪਾਸਿਓਂ ਅਪ ਰਾਣਾਘਾਟ ਲੋਕਲ ਸਟੇਸ਼ਨ ਵੱਲ ਆ ਰਹੀ ਸੀ ਜਿਸ ’ਚ ਵੱਡੀ ਗਿਣਤੀ ’ਚ ਯਾਤਰੀ ਸਵਾਰ ਸਨ। ਦੋਵਾਂ ਟ੍ਰੇਨਾਂ ਕਾਰਸ਼ੈੱਡ ’ਚ ਨਾਲ-ਨਾਲ ਲਾਈਨਾਂ ’ਤੇ ਚੱਲ ਰਹੀਆਂ ਸਨ। ਇਸੇ ਦੌਰਾਨ ਅਚਾਨਕ ਰਾਣਾਘਾਟ ਲੋਕਲ ਟ੍ਰੇਨ ਦਾ ਇਕ ਪਹੀਆ ਪਟੜੀ ਤੋਂ ਉੱਤਰ ਕੇ ਸਾਈਡ ਲਾਈਨ ਵੱਲ ਵੱਧ ਗਿਆ ਜਿਸ ਨਾਲ ਉਹ ਖ਼ਾਲੀ ਟ੍ਰੇਨ ਨਾਲ ਟਕਰਾ ਗਿਆ। ਰੇਲਵੇ ਦੀ ਮੁੱਢਲੀ ਜਾਂਚ ’ਚ ਲੋਕੋਪਾਇਲਟ ਦੀ ਲਾਪਰਵਾਹੀ ਸਾਹਮਣੇ ਆਈ ਹੈ। ਰੇਲਵੇ ਨੇ ਇਸ ਘਟਨਾ ਦੀ ਜਾਂਚ ਦੇ ਨਿਰਦੇਸ਼ ਦਿੱਤੇ ਹਨ ਤੇ ਇਕ ਕਮੇਟੀ ਦਾ ਗਠਨ ਕੀਤਾ ਹੈ। ਨਾਲ ਹੀ ਲੋਕੋਪਾਇਲਟ ਨੂੰ ਮੁਅੱਤਲ ਕਰ ਦਿੱਤਾ ਹੈ।
ਟ੍ਰੇਨ ਸੇਵਾਵਾਂ ਹੋਈਆਂ ਪ੍ਰਭਾਵਿਤ
ਇਸ ਹਾਦਸੇ ਤੋਂ ਬਾਅਦ ਸਿਆਲਦਹ ਮੇਨ ਲਾਈਨ ’ਤੇ ਟ੍ਰੇਨ ਸੇਵਾਵਾਂ ਪ੍ਰਭਾਵਿਤ ਹੋਈਆਂ। ਟੱਕਰ ਤੋਂ ਬਾਅਦ 18 ਲੋਕਲ ਟ੍ਰੇਨਾਂ ਨੂੰ ਰੱਦ ਕਰਨਾ ਪਿਆ। ਕਈ ਟ੍ਰੇਨਾਂ ਵੱਖ-ਵੱਖ ਸਟੇਸ਼ਨਾਂ ’ਤੇ ਅਤੇ ਰਸਤੇ ’ਚ ਹੀ ਕਈ ਘੰਟੇ ਰੁਕੀਆਂ ਰਹੀਆਂ। ਲਗਪਗ ਚਾਰ ਘੰਟੇ ਬਾਅਦ ਰੇਲ ਸੇਵਾ ਬਹਾਲ ਹੋਈ।
