ਨਵੀਂ ਦਿੱਲੀ, ਏਐਨਆਈ : ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ 1 ਫਰਵਰੀ ਨੂੰ ਸੰਸਦ ’ਚ ਕੇਂਦਰੀ ਬਜਟ 2022 ਪੇਸ਼ ਕਰੇਗੀ। ਹਾਲਾਂਕਿ ਬਜਟ ਸੈਸ਼ਨ ਦੇ ਪਹਿਲੇ ਦੋ ਦਿਨਾਂ ਦੌਰਾਨ ਦੋਵਾਂ ਸਦਨਾਂ ’ਚ ਕੋਈ ਸਿਫ਼ਰ ਕਾਲ ਨਹੀਂ ਹੋਵੇਗਾ। ਨਿਊਜ਼ ਏਜੰਸੀ ਏਐਨਆਈ ਮੁਤਾਬਕ ਬਜਟ ਸੈਸ਼ਨ ਦੌਰਾਨ ਸੰਸਦ ਦੇ ਦੋਵੇਂਂ ਸਦਨਾਂ ’ਚ 31 ਜਨਵਰੀ ਤੇ 1 ਜਨਵਰੀ ਨੂੰ ਜ਼ੀਰੋ ਆਵਰ ਮੁਲਤਵੀ ਕੀਤਾ ਜਾਵੇਗਾ। ਅਜਿਹਾ ਰਾਸ਼ਟਰਪਤੀ ਦੇ ਭਾਸ਼ਣ ਤੇ ਆਮ ਬਜਟ ਦੀ ਪੇਸ਼ਕਾਰੀ ਕਾਰਨ ਕੀਤਾ ਗਿਆ ਹੈ।
ਦਰਅਸਲ, ਕੇਂਦਰੀ ਵਿੱਤ ਮੰਤਰੀ 1 ਫਰਵਰੀ ਨੂੰ ਸਵੇਰੇ 11 ਵਜੇ ਸੰਸਦ ’ਚ ਬਜਟ ਪੇਸ਼ ਕਰਨਗੇ। ਬਜਟ ਭਾਸ਼ਣ ਕਿੰਨਾ ਸਮਾਂ ਚੱਲੇਗਾ, ਇਹ 1:30 ਤੋਂਂ 2 ਘੰਟੇ ਦੇ ਵਿਚਕਾਰ ਮੰਨਿਆ ਜਾ ਰਿਹਾ ਹੈ। ਹਾਲਾਂਕਿ, ਭਾਸ਼ਣ ਪੜ੍ਹਨ ਦੀ ਮਿਆਦ ਵੀ ਆਮ ਸਮੇਂ ਤੋਂਂ ਵੱਧ ਹੋ ਸਕਦੀ ਹੈ। ਇਸ ਤੋਂਂ ਪਹਿਲਾਂ ਸਾਲ 2020 ’ਚ 2 ਘੰਟੇ 40 ਮਿੰਟ ਦਾ ਬਜਟ ਭਾਸ਼ਣ ਦੇਸ਼ ਦੇ ਇਤਿਹਾਸ ’ਚ ਸਭ ਤੋਂਂ ਲੰਬਾ ਸੀ।
ਕੋਰੋਨਾ ਦੇ ਵਧਦੇ ਮਾਮਲਿਆਂ ਦੇ ਮੱਦੇਨਜ਼ਰ, ਸੰਸਦ ਦਾ ਆਗਾਮੀ ਬਜਟ ਸੈਸ਼ਨ ਸਿਹਤ ਮੰਤਰਾਲੇ ਦੁਆਰਾ ਨਿਰਧਾਰਤ ਸਖ਼ਤ ਕੋਵਿਡ -19 ਪ੍ਰੋਟੋਕੋਲ ਦੇ ਅਧੀਨ ਹੋਵੇਗਾ। ਸੰਸਦ ’ਚ ਬੈਠਣ ਦੀ ਵਿਵਸਥਾ ਇਸ ਤਰ੍ਹਾਂ ਕੀਤੀ ਜਾਵੇਗੀ ਕਿ ਸਰੀਰਕ ਦੂਰੀ ਦਾ ਪਾਲਣ ਕੀਤਾ ਜਾ ਸਕੇ। ਲੋਕ ਸਭਾ ਤੇ ਰਾਜ ਸਭਾ ਦੇ ਦੋਵੇਂਂ ਚੈਂਬਰਾਂ ’ਚ, ਵਿਜ਼ਿਟਰਜ਼ ਗੈਲਰੀ ਤੇ ਸੈਂਟਰਲ ਹਾਲ ’ਚ ਵੀ ਸੰਸਦ ਮੈਂਬਰਾਂ ਦੇ ਬੈਠਣ ਦੀ ਵਿਵਸਥਾ ਕੀਤੀ ਜਾਵੇਗੀ। ਦੋਵਾਂ ਸਦਨਾਂ ਦਾ ਸਮਾਂ ਵੱਖ-ਵੱਖ ਹੋਵੇਗਾ। ਰਾਜ ਸਭਾ ਸਵੇਰੇ 10:00 ਵਜੇ ਤੋਂਂ ਦੁਪਹਿਰ 3:00 ਵਜੇ ਤਕ ਤੇ ਲੋਕ ਸਭਾ ਸ਼ਾਮ 4:00 ਵਜੇ ਤੋਂਂ ਰਾਤ 10:00 ਵਜੇ ਤਕ ਚੱਲੇਗੀ।
ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਕਾਂਗਰਸ ਸੰਸਦ ਦੇ ਬਜਟ ਸੈਸ਼ਨ ’ਚ ਮਹਿੰਗਾਈ, ਬੇਰੁਜ਼ਗਾਰੀ ਤੇ ਸਰਹੱਦ ’ਤੇ ਚੀਨ ਦੇ ਵਧਦੇ ਹਮਲੇ ਨਾਲ ਲੋਕਾਂ ਦੀ ਆਮਦਨ ’ਚ ਵਧਦੀ ਅਸਮਾਨਤਾ ਦੇ ਮੁੱਦੇ ’ਤੇ ਭਾਜਪਾ ਸਰਕਾਰ ਨੂੰ ਘੇਰਨ ਦੀ ਕੋਸ਼ਿਸ਼ ਕਰੇਗੀ। ਪਾਰਟੀ ਇਸ ਦੇ ਲਈ ਹੋਰ ਵਿਰੋਧੀ ਪਾਰਟੀਆਂ ਦਾ ਵੀ ਸਹਾਰਾ ਲਵੇਗੀ। ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੀ ਅਗਵਾਈ ’ਚ ਸ਼ੁੱਕਰਵਾਰ ਨੂੰ ਪਾਰਟੀ ਦੇ ਸੰਸਦੀ ਰਣਨੀਤਕ ਸਮੂਹ ਦੀ ਬੈਠਕ ਹੋਈ। ਬਜਟ ਸੈਸ਼ਨ ’ਚ ਵਿਰੋਧੀ ਧਿਰਾਂ ਦੇ ਤਾਲਮੇਲ ਰਾਹੀਂ ਆਮਦਨ ’ਚ ਅਸਮਾਨਤਾ ਕਾਰਨ ਕਰੋੜਾਂ ਲੋਕ ਮੁੜ ਗ਼ਰੀਬੀ ਰੇਖਾ ਤੋਂਂ ਹੇਠਾਂ ਆਉਣ ਦੇ ਨਾਲ-ਨਾਲ ਚੀਨੀ ਚੁਣੌਤੀ ’ਤੇ ਬਹਿਸ ਨੂੰ ਤਰਜੀਹ ਦੇਣ ਦਾ ਫੈਸਲਾ ਕੀਤਾ ਗਿਆ।
