ਨਵੀਂ ਦਿੱਲੀ, ਬਿਜ਼ਨੈੱਸ ਡੈਸਕ : Hindenburg Research Another Big One:ਕੁਝ ਸਮਾਂ ਪਹਿਲਾਂ ਅਮਰੀਕਾ ਦੀ ਸ਼ਾਰਟ ਸੇਲਰ ਕੰਪਨੀ ਹਿੰਡਨਬਰਗ ਰਿਸਰਚ (Hindenburg Research) ਨੇ ਭਾਰਤ ਦੇ ਅਡਾਨੀ ਗਰੁੱਪ 'ਤੇ ਦੋਸ਼ ਲਾਇਆ ਸੀ ਕਿ ਕੰਪਨੀ ਨੇ ਸ਼ੇਅਰਾਂ ਨਾਲ ਛੇੜਛਾੜ ਕੀਤੀ ਹੈ, ਜਿਸ ਤੋਂ ਬਾਅਦ ਦੋਵਾਂ ਕੰਪਨੀਆਂ 'ਚ ਦੋਸ਼ਾਂ ਅਤੇ ਜਵਾਬੀ ਦੋਸ਼ਾਂ ਦਾ ਦੌਰ ਚੱਲ ਪਿਆ।
ਹੁਣ ਇੱਕ ਵਾਰ ਫਿਰ ਹਿੰਡਨਬਰਗ ਸੁਰਖੀਆਂ ਵਿੱਚ ਹੈ। ਹਿੰਡਨਬਰਗ ਨੇ ਆਪਣੇ ਟਵਿੱਟਰ ਅਕਾਊਂਟ ਤੋਂ ਜਾਣਕਾਰੀ ਦਿੱਤੀ ਹੈ ਕਿ ਉਹ ਜਲਦ ਹੀ ਇਕ ਹੋਰ ਖੁਲਾਸਾ ਕਰਨ ਜਾ ਰਹੀ ਹੈ। ਅਜਿਹੇ 'ਚ ਲੋਕ ਵੱਖ-ਵੱਖ ਤਰ੍ਹਾਂ ਦੇ ਅੰਦਾਜ਼ੇ ਲਗਾ ਰਹੇ ਹਨ। ਹੁਣ ਦੇਖਣਾ ਹੋਵੇਗਾ ਕਿ ਇਸ ਵਾਰ ਹਿੰਡਨਬਰਗ ਅਡਾਨੀ ਗਰੁੱਪ ਦੀ ਕਿਸੇ ਹੋਰ ਕੰਪਨੀ ਬਾਰੇ ਖੁਲਾਸਾ ਕਰੇਗਾ ਜਾਂ ਫਿਰ ਕਿਸੇ ਹੋਰ ਕੰਪਨੀ ਬਾਰੇ ਸੁਣਨ ਨੂੰ ਮਿਲੇਗਾ।
ਟਵਿੱਟਰ 'ਤੇ ਕੀਤਾ ਖੁਲਾਸਾ
ਹਿੰਡਨਬਰਗ ਨੇ ਆਪਣੇ ਟਵਿੱਟਰ ਅਕਾਊਂਟ 'ਚ ਕਿਹਾ, 'ਨਵੀਂ ਰਿਪੋਰਟ ਜਲਦ ਹੀ - ਇਕ ਹੋਰ ਵੱਡੀ ਰਿਪੋਰਟ'। ਇਸ ਤੋਂ ਇਲਾਵਾ ਟਵੀਟ 'ਚ ਹੋਰ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ।
ਅਡਾਨੀ ਨੂੰ ਹੋਇਆ ਬਹੁਤ ਨੁਕਸਾਨ
ਹਿੰਡਨਬਰਗ ਦੀ ਰਿਪੋਰਟ ਦਾ ਅਸਰ ਇਸ ਤਰ੍ਹਾਂ ਦੇਖਿਆ ਗਿਆ ਕਿ ਗੌਤਮ ਅਡਾਨੀ ਦੀ ਦੌਲਤ 'ਚ 60 ਫੀਸਦੀ ਤੱਕ ਦੀ ਕਮੀ ਆਈ ਹੈ। M3M ਹੁਰੁਨ ਗਲੋਬਲ ਰਿਚ ਲਿਸਟ ਦੇ ਅਨੁਸਾਰ, ਅਡਾਨੀ ਨੇ ਪਿਛਲੇ ਸਾਲ ਵਿੱਚ ਹਰ ਹਫ਼ਤੇ 3,000 ਕਰੋੜ ਰੁਪਏ ਦੀ ਦੌਲਤ ਗੁਆ ਦਿੱਤੀ ਹੈ, ਜਿਸ ਨਾਲ ਉਸਦੀ ਕੁੱਲ ਸੰਪਤੀ ਵਿੱਚ 60 ਪ੍ਰਤੀਸ਼ਤ ਦੀ ਕਮੀ ਆਈ ਹੈ। ਅਡਾਨੀ 11 ਸਥਾਨ ਹੇਠਾਂ ਆ ਕੇ ਦੁਨੀਆ ਦੇ 23ਵੇਂ ਸਭ ਤੋਂ ਅਮੀਰ ਵਿਅਕਤੀ ਬਣ ਗਏ ਹਨ। ਹਿੰਡਨਬਰਗ ਦੀ ਨਵੀਂ ਰਿਪੋਰਟ ਦੀ ਖਬਰ ਤੋਂ ਬਾਅਦ ਭਾਰਤ ਦੀਆਂ ਬਾਕੀ ਕੰਪਨੀਆਂ ਦੀ ਚਿੰਤਾ ਵਧ ਗਈ ਹੈ।
ਦੂਜੇ ਪਾਸੇ ਅਡਾਨੀ ਗਰੁੱਪ ਨੂੰ ਲੰਬੇ ਸਮੇਂ 'ਚ ਫਾਇਦਾ ਹੋਇਆ ਹੈ। ਰਿਪੋਰਟ ਮੁਤਾਬਕ ਪਿਛਲੇ 10 ਸਾਲਾਂ 'ਚ ਅਡਾਨੀ ਦੀ ਕੁਲ ਜਾਇਦਾਦ 1,225 ਫੀਸਦੀ ਅਤੇ ਅੰਬਾਨੀ ਦੀ 356 ਫੀਸਦੀ ਵਧੀ ਹੈ। ਇਸ ਸਮੇਂ ਭਾਰਤ ਦੇ ਸਭ ਤੋਂ ਅਮੀਰ ਵਿਅਕਤੀ ਦਾ ਖਿਤਾਬ ਮੁਕੇਸ਼ ਅੰਬਾਨੀ ਕੋਲ ਹੈ।
