ਨਵੀਂ ਦਿੱਲੀ, ਬਿਜ਼ਨੈੱਸ ਡੈਸਕ: ਹਿੰਡਨਬਰਗ ਦੇ ਦੋਸ਼ਾਂ ਕਾਰਨ ਅਡਾਨੀ ਗਰੁੱਪ ਦੇ ਮੁਖੀ ਗੌਤਮ ਅਡਾਨੀ ਦੀ ਜਾਇਦਾਦ 'ਚ ਭਾਰੀ ਕਮੀ ਆਈ ਹੈ। M3M ਹੁਰੁਨ ਗਲੋਬਲ ਰਿਚ ਲਿਸਟ ਦੇ ਅਨੁਸਾਰ, ਅਡਾਨੀ ਨੇ ਪਿਛਲੇ ਸਾਲ ਵਿੱਚ ਹਰ ਹਫ਼ਤੇ 3,000 ਕਰੋੜ ਰੁਪਏ ਦੀ ਦੌਲਤ ਗੁਆ ਦਿੱਤੀ ਹੈ, ਜਿਸ ਨਾਲ ਉਸਦੀ ਕੁੱਲ ਸੰਪਤੀ ਵਿੱਚ 60 ਫ਼ੀਸਦੀ ਦੀ ਕਮੀ ਆਈ ਹੈ।
ਇਸ ਦੇ ਨਾਲ ਹੀ ਉਸ ਤੋਂ ਭਾਰਤ ਦੇ ਸਭ ਤੋਂ ਅਮੀਰ ਵਿਅਕਤੀ ਹੋਣ ਦਾ ਖਿਤਾਬ ਵੀ ਖੋਹ ਲਿਆ ਗਿਆ ਹੈ। ਰਿਲਾਇੰਸ ਇੰਡਸਟਰੀਜ਼ ਦੇ ਮੁਕੇਸ਼ ਅੰਬਾਨੀ ਨੂੰ ਸਭ ਤੋਂ ਅਮੀਰ ਭਾਰਤੀ ਦਾ ਦਰਜਾ ਦਿੱਤਾ ਗਿਆ ਹੈ।
ਰੈਂਕਿੰਗ ਹੋਈ ਘੱਟ
ਰਿਪੋਰਟ ਮੁਤਾਬਕ ਅਡਾਨੀ ਅਤੇ ਅੰਬਾਨੀ ਦੋਵੇਂ ਗਲੋਬਲ ਅਰਬਪਤੀਆਂ ਦੀ ਰੈਂਕਿੰਗ ਵਿੱਚ ਹੇਠਾਂ ਆ ਗਏ ਹਨ। ਅਡਾਨੀ 11 ਸਥਾਨ ਹੇਠਾਂ ਆ ਕੇ ਦੁਨੀਆ ਦੇ 23ਵੇਂ ਸਭ ਤੋਂ ਅਮੀਰ ਵਿਅਕਤੀ ਬਣ ਗਏ ਹਨ, ਜਦਕਿ ਅੰਬਾਨੀ ਦੁਨੀਆ ਦੇ ਨੌਵੇਂ ਸਭ ਤੋਂ ਅਮੀਰ ਵਿਅਕਤੀ ਹਨ। ਵਰਤਮਾਨ ਵਿੱਚ ਅਡਾਨੀ ਦੀ ਕੁੱਲ ਜਾਇਦਾਦ 53 ਬਿਲੀਅਨ ਅਮਰੀਕੀ ਡਾਲਰ ਹੈ। ਇਸ ਦੇ ਨਾਲ ਹੀ ਮਾਰਚ ਦੇ ਅੱਧ ਤੱਕ ਅੰਬਾਨੀ ਦੀ ਕੁੱਲ ਜਾਇਦਾਦ 20 ਫੀਸਦੀ ਘੱਟ ਕੇ 82 ਅਰਬ ਅਮਰੀਕੀ ਡਾਲਰ 'ਤੇ ਆ ਗਈ ਹੈ।
ਲੰਬੇ ਸਮੇਂ ਵਿਚ ਵਾਧਾ
ਮਾਰਚ ਦੇ ਅੰਕੜਿਆਂ 'ਚ ਭਾਵੇਂ ਅੰਬਾਨੀ ਅਤੇ ਅਡਾਨੀ ਦੋਵਾਂ ਦੀ ਜਾਇਦਾਦ 'ਚ ਕਮੀ ਆਈ ਹੈ, ਪਰ 10 ਸਾਲਾਂ ਦੇ ਨਜ਼ਰੀਏ ਤੋਂ ਦੋਵਾਂ ਦੀ ਜਾਇਦਾਦ 'ਚ ਭਾਰੀ ਵਾਧਾ ਹੋਇਆ ਹੈ। ਰਿਪੋਰਟ ਮੁਤਾਬਕ ਅਡਾਨੀ ਦੀ ਕੁਲ ਜਾਇਦਾਦ 1,225 ਫੀਸਦੀ ਅਤੇ ਅੰਬਾਨੀ ਦੀ 356 ਫੀਸਦੀ ਵਧੀ ਹੈ।
ਇਹ ਹਨ ਵੱਖ-ਵੱਖ ਖੇਤਰਾਂ ਵਿਚ ਸਭ ਤੋਂ ਅਮੀਰ
ਸਾਰੇ ਸੈਕਟਰਾਂ 'ਚ ਹੈਲਥਕੇਅਰ ਸੈਕਟਰ ਵਿੱਚ ਸਭ ਤੋਂ ਅਮੀਰ ਵਿਅਕਤੀ ਪੁਣੇ ਦੇ ਸੀਰਮ ਇੰਸਟੀਚਿਊਟ ਦੇ ਸਾਇਰਸ ਪੂਨਾਵਾਲਾ ਹੈ, ਜਿਸਦੀ ਕੁੱਲ ਜਾਇਦਾਦ 27 ਬਿਲੀਅਨ ਡਾਲਰ ਹੈ। ਜਦਕਿ, ਬੀਜੂ ਰਵੀਨਦਰਨ USD 3.3 ਬਿਲੀਅਨ ਦੀ ਕੁੱਲ ਜਾਇਦਾਦ ਦੇ ਨਾਲ ਸਭ ਤੋਂ ਅਮੀਰ ਸਿੱਖਿਆ ਉੱਦਮੀ ਹੈ। ਏਸ਼ੀਅਨ ਪੇਂਟਸ ਦੇ ਅਸ਼ਵਿਨ ਦਾਨੀ 7.1 ਬਿਲੀਅਨ ਡਾਲਰ ਦੀ ਸੰਪਤੀ ਦੇ ਨਾਲ ਆਪਣੇ ਖੇਤਰ ਵਿੱਚ ਸਭ ਤੋਂ ਅਮੀਰ ਉਦਯੋਗਪਤੀ ਹਨ।
ਅਰਬਪਤੀਆਂ 'ਚ ਰਾਧਾ ਵੇਂਬੂ ਸਭ ਤੋਂ ਟਾਪ 'ਤੇ
ਦੂਜੇ ਪਾਸੇ ਮਹਿਲਾ ਅਰਬਪਤੀਆਂ ਦੀ ਸੂਚੀ ਵਿੱਚ ਰਾਧਾ ਵੇਂਬੂ ਸਭ ਤੋਂ ਉੱਪਰ ਹੈ। 4 ਬਿਲੀਅਨ ਡਾਲਰ ਦੀ ਕੁੱਲ ਜਾਇਦਾਦ ਦੇ ਨਾਲ, ਰਾਧਾ ਵੇਂਬੂ ਸਾਫਟਵੇਅਰ ਅਤੇ ਸੇਵਾਵਾਂ ਦੇ ਖੇਤਰ ਤੋਂ ਦੁਨੀਆ ਦੀ ਦੂਜੀ ਸਭ ਤੋਂ ਅਮੀਰ ਸਵੈ-ਬਣਾਈ ਮਹਿਲਾ ਅਰਬਪਤੀ ਹੈ।
